1-4-2013 行頹山

昨日被騙，結果變左今日去行山。

凌晨４點幾起身，今次堅有人來接喇，先坐架細van上Sarangot睇日出。

由停車點去到睇日出的位置其實重有一段路要行，一路上斜同上樓梯，老實講，我體能真係唔係好掂，平時我運動都只係瑜伽同游下頹水，突然做咁多帶氧運動真係會攞左我條命。

終於上到去觀光台，剛好趕得切睇日出。

<--睇日出

由觀光台上可以望到整個Annapurna山脈，好靚好壯觀。

睇左一陣，個guide叫我地開始起程，其實剛才段路令我好擔心我會行好耐都行唔晒，不過個guide話之後其實都係平路為主。

果然。

由觀光台出發，行一段小路去到一個草地上，我地開始食報紙包住的麵包早餐。

<--望住呢個景食早餐

其實我冇諗衛生問題，而老實講，望住個雪山山脈食早餐真係好開心。

食飽早餐開始繼續行山喇，沿途主要係村落多，中途見到幾間好靚的屋，導遊話係酒店，其實住o係度幾晚都真係超正。

<--超靚景的酒店

一路行山影相，沿途有Ｄ小朋友會拎張紙衝過來問你捐錢，不過導遊都幫我地趕走晒，成段路都見到好多羊，好飄零燕呀！

<--咩~~~~

去到後段更近Annapurna Circuit，景色好靚。行咗四個鐘左右，又有車接我地返酒店。

<--山區小村莊

果然頹。

返酒店沖涼洗衫（又洗），訓一陣就出去食晏，嚴格來說，呢個下晝係hea。

<--German Bakery食甜品

之後去搵下D yoga school，不過時間同身體狀況問題，最後都冇join到。

然後回酒店露台寫日記吹風，望下百鳥歸巢，一樂也。

睇完雀仔個天又黑晒，等佢停雨我地就出去琴晚間餐廳食mo mo。

Yummy！

食飽飽回酒店，沿途望天有好多星星，不過始終都係見唔到一條好清的銀河，可惜。