跟住開始我成個行程中最擔心的一個項目－行山。
之前看介紹，知道今日要行約三小時的山，我對行山係有陰影的，以前讀書玩outward bound，行左半個鐘我就面都青晒，需要同伴幫我減輕背包內的東西再拖慢步伐行先可以繼續。
我地先搭船去入少少的森林區，跟住開始行山。
我地呢組人有老有嫩，另外的團友係來自檳城的華人，成家人都好nice，我覺得最利害係我着住TEVA行山鞋都行到想死，但佢地只係着住拖鞋都健步如飛。
行左約三個半鐘，有乜特別之處呢？其實我覺得唔算太特別，因為導遊冇乜點介紹沿途我地見到的野，只係一路上山上山上山。
終於上到山頂，但逗留的時間亦不多，只是遠望無邊無際的叢林，便要下山了。
而另一個行山節目的另一個特別之處，就係行全球最長的吊橋。
行到十二點幾，又食午餐了，不過今日我地豪少少，去酒店的餐廳食野。
食物唔錯，但我竟然飲到史上最難飲的凍檸茶。
食飽回酒店沖個涼，跟住準備玩rapid shooting。
最初唔知乜野係rapid shooting，以為係影下相鬥下快咁，原來錯晒！佢介紹寫話prepare to get wet，我以為只係整濕下身，點知咁痴線！
我地坐長艇去森林入Ｄ的地區，呢度的流水比較急，長艇會突然轉彎濺起大浪，成身都濕晒！
好彩之前一齊行山的小妹妹叫我一定要收埋部相機，幸好我將部機收埋在兩個膠袋中，因為落船後個背包係裝晒水。
另一個精彩之處，係兩隻長艇會駛到好近，然後船上船員會用木掌激起大浪，攻擊隔離的長艇。
我地全團冇準備之下被淋到濕晒。
好好笑，大家成身濕晒之下竟然係去參觀森林入的原居民Orang Asli Village，呢個係唯一一個被馬來西亞認可居住在森林內的民族，佢地係馬來西亞國藉，只是佢地絕少同外界溝通，連睇醫生都唔會。
村民會示範原始取火方法，佢地用乾木同乾葉，三十秒就弄到火種，好利害！
另外亦會介紹佢地打獵的武器，材料都係森林內常見的東西。
參觀呢條村都係一個幾好的經驗，知道原始人係點生活，佢地會活捉猴子來食，村長係一定要識醫術，全村人都係靠佢。
我地今次參觀的村落，村民只是剛搬來五個月，佢地搬村事前係唔會通知任何人，佢地亦唔知自己幾時會搬，如果有村民死了，或者附近已經冇晒獵物，佢地就會搬走。
村民話Taman Negara真係有老虎同大象的，但佢地會即走，咁好正常，冇理由用條命向難度挑戰。
村民偶然會出村同外界聯絡，不過亦因為呢個聯絡，令村內的小童好細個就會接觸到香煙，導遊話見到村童食煙唔好覺得奇怪喎。
參觀完村落，又來一轉Rapid Shooting，經過去程的經驗，回程時團友早有準備，拾了多支木頭來濺大水花攻擊鄰艇。
跟住又回酒店沖涼，然後晚飯。
晚飯後自由活動，我同同伴決定自費參加Night Safari活動，呢個活動係坐在吉普車頂或車尾去看森林內的動物。
玩左兩個鐘，唔係見到好多動物。
不過好正常，車行的地方基本上都係車路，小動物聽到車聲正常都會走。
但對於未坐過吉普車的我來說都係一個幾好的經歷。
導遊一搵到動物就用電筒照俾我地看，不過我地只係見到五種動物而已。
玩完，回酒店睡了。
沒有留言:
張貼留言