o係香港我根本唔會咁神心早起身飲早茶，離開左香港的我果然係唔同晒呀！
開頭入到去完全唔識點叫野食，問問隔離桌的太太，原來只要我地坐低就會有職員過來開位，跟住會有Ｄ姐姐捧住點心過來問你食唔食，每一碟點心都係兩蚊馬幣。
食飽飽就開始一日的活動喇。
望住地圖行下China Town先啦。
唔知係咪太早定臨近新年，China Town其實冇乜特別野睇，一路行一路見到好多好古舊的樓，就好似三四十年前的香港一樣。（我都未出世）
樓上張相係當地的一間戲院，亦係我地認路返hostel的地標之一。呢間戲院全部都係播疑似印度片，我有諗過不如買票入去睇番場戲，但同伴擔心間戲院可能會好臭，所以最終作罷。
離開China Town，跟住地圖行到去海邊。
（出發前驚覺陪伴我旅行多年的606唔見左，呢隻606係我在中環機鐵站搭機場快線前買的，大隻過我原本隻一倍）
去到海邊吹左一陣海風，再睇睇地圖。
突然有個當地男人問我地想去邊喎，查實去檳城前我係冇乜點睇過資料，唔太知道檳城有乜景點，呢個男人建議我地繼續沿海行去砲台玩。
咁我地沿住海邊邊行邊影相，十幾分鐘後行到砲台了。
砲台入場費２蚊，物有所值，我地在砲台影下相hea hea下，又一個鐘了。
呢個砲台係檳城最古老的景點之一，至於歷史方面，我就真係唔係好熟了。
玩完砲台，我地繼續沿海邊行，睇地圖有介紹一個叫做traditional jetty的東西，圖片影住傳統的船仔，所以想睇一睇。
烈日當空下行左近四十五分鐘都重未見到，問附近小店店主，又話我地行過左頭，行番轉頭見到一個叫做姓陳橋的東西，轉入去睇下先。
可能潮退的關係，橋的一半都係在一處好污糟的土地上，唔好睇上面幅圖好似好得意好靚咁，其實呢度好臭，但沿橋行見到左右隔離的屋仔有類似餐廳的東西，有人食緊野架喎！
橋的末端係一座小廟，我地冇入到去。
成條橋最有趣係佢個廁所。
行完姓陳橋，在附近的食市食飯，跟住行去小印度。
今次旅行不得不讚lonely planet，佢真係一本非常詳細的旅遊書，而且地圖精確，我地迷路時好多時都係睇番lonely planet的地圖搵路，佢的地圖重準過我地在機場拿到的檳城地圖。（註：雖然旅途後期我地因為太信任lonely planet而中招，但普遍來說，佢絕對比香港出版閃閃令的旅遊書好一萬倍）
小印度區有好幾間畫廊同藝術品店，值得參觀。
有樣幾攪笑的事，原來孫中山的其中一個基地都在小印度區，我以為會在China Town，哈哈…
行完小印度就返旅館休息下，四點半再出動。
今次沿另一個方向行，去到Parkson Shopping Mall，在商場內行下食下涼下冷氣，大約六點又去食飯了，哈哈…
是晚去左一度叫做紅園Night Market的夜市食飯，食飯前，八卦行左去隔離的朱古力店行下，原來呢間朱古力店係專做旅遊團生意，所以…貴到爆…
雖然唔係好肚餓，但都食左串燒、魔鬼魚同雞翼，食飽，又回hostel休息。
休息過後，九點又出去附近食野，我真係愛上hostel附近夜晚先推出來的小食檔，有一檔魚丸粉真係味道一流，每晚都食一碗！
食飽飽，回hostel時被職員拉住吹水。其實去旅行我好少同其他人講野，不過職員誠意邀請，就坐低一陣啦。
hostel真係乜人都有，我估唔到而家大陸都咁多人自由行，而坐在我對面的一堆男外國人，好似今日新識左幾個金髮美女。
（註：以上的說話係明日遊記的伏線）
沒有留言:
張貼留言