一早起身落樓下食早餐，自助餐，都幾好味。
叫左個炒蛋
食飽飽，等住去西樵山。
606做左酒店副經理呀
我地今日包左架七人車去西樵山，司機充當埋導遊。
架車都幾新架
由於西樵山各景點都比較分散，而由佛山去西樵山需要四十五分鐘車程，為免麻煩，貴少少包架車好過。
首站，去睇下南海觀音。
呢個南海觀音真係好似我地香港的天壇大佛，一樣要行長樓梯。
當然要瘋狂影相啦！
可惜污染太嚴重，冇藍天白雲。
玩左個幾鐘，我地去第二站－石燕岩。
司機話佢車咁多人去西樵山，我地係第二批客要求去石燕岩，佢話石燕岩又係要行好長的樓梯，上落都比較辛苦，而一路去石燕岩的途中，真係一個人都冇。
石燕岩其實係一個山洞，洞入面有個＂水池＂的物體。（我唔知點形容，點佢都唔會叫做湖呱？）咁遊客區，當然有屈水的地方啦。
我地俾錢坐小艇遊山洞，有個划艇的船夫沿途講解，但不專業的佢，講的每一粒字都只係講俾自己聽。
我約莫聽到話Ｄ岩石一層層咁落水，水又好清好深…
真係幾清
行完石燕岩，去另一個景點白雲洞。
最先我去西樵山的原因，係因為見到白雲洞的美景，但去到，大失所望。
果然照片永遠都呃到人。
行到好累，決定返佛山了。
中途叫司機介紹我地去食下廣東菜，佢就車左我地去一間在石灣的酒家食飯。（唔記得個名）
屋企人盛讚！不過我覺得一般啦…
之後去左新石灣美術陶瓷廠參觀，因為司機話呢度同公仔街完全唔同，貴的野都會放在呢度賣。
裡面的陶瓷有平有貴，我見到最貴的竟然賣三十八萬，好驚好驚…
我地重可以參觀埋製陶瓷的地方。
我地參觀完貴陶瓷，梗係睇埋平野啦。
知足常樂
其實我真係想買多幾個，但確實冇位放。
玩完一日，司機車我地返酒店，我地稍稍休息一會，又再出動去祖廟（當時已經下午四點）。
其實佛山係幾出名手工藝，除了陶瓷，佢的剪紙都好出名。
佛山剪紙
由於我地趕住入祖廟（以為佢收五點），所以冇乜仔細睇到就走了。
你好
原來祖廟收六點，等我地咁趕…
祖廟係佛山最出名的旅遊點，祖廟除了有座廟之外，重會有葉問同黃飛鴻。
葉問
其實呢兩個館都冇乜野睇。
基本上本人認為祖廟冇乜特別。
所以我地唔係留左好耐就走了。
不過臨走前見到一個奇景，在佛門清靜地，竟然有人打麻雀同玩啤牌，哈哈…原來楊千嬅套”行運超人”係堅的！
跟住我地搭車去左東方廣場行一陣，本來諗住食野，但大家都太飽，求其行左一陣就返酒店抖下。
不過佛山真係冇乜的士，我地搭類似泰國的tuk tuk返酒店，六個人一架車，勁！
休息完，七點幾再出動食晚飯，我地酒店附近其實冇乜野食，所以我地行去東方廣場的美食坊，搵左一間食齋的餐廳食飯。
呢間齋舖真係好新潮，佢位於東方美食坊三樓，叫做素樂地，幾過癮。餐廳裝修好舒服，而佢的齋菜都幾特別…
我未食過咁辣的齋…
不過是晚太累，冇帶相機影相，可惜可惜。
飲飽食醉，行返酒店，途中每人各飲番杯鄧老涼茶，正呀！
沒有留言:
張貼留言