30-3-2012 熱那亞好熱情哦~

晨咁早起身，走去酒店附近求其搵間cafe食早餐。

食左個牛角包同飲左杯熱朱古力，呢度的朱古力唔係開粉，應該係整溶朱古力俾你飲，出奇地濃稠，好味！

食飽，去超市買少少糧草，執好行李就去火車站，是日搭火車去熱那亞。

熱那亞係一個海口城市，並唔算港人熱門的旅遊點，出發前搵到的資料唔多，所以去到先算囉。

搭個幾鐘火車就到熱那亞。熱那亞有兩個主要火車站，Principe同Brignole，前者在市中心，兩站距離爭好遠，唔好落錯哦～

一落車就搵酒店，點知出火車就行錯方向，一出火車其實轉左行就已經係市中心，但我地行錯右邊，好彩有兩個好心人主動行埋來教路，先唔會越行越遠咋。

離開火車站發覺路標非常清晰，基本上所有酒店都有路牌，真係好方便。

好快就到酒店，呢兩日住在hotel vittoria，離火車站三分鐘步行距離，離市中心各景點只有十分鐘步行路程，非常方便。

去到酒店，員工異常有禮貌，佢地主動俾張熱那亞地圖我地，話晒俾我地聽市中心點行，就幫我搬行李上房（我講左幾次我自己搬就得，但佢都好堅持）。

對熱那亞第一印象好好哦。

Via Balbi

 整理儀容後就行去市中心，沿路見到皇宮，只係入內睇左個花園影左相就走，因為實在太多地方想行了。

行左十分鐘左右去到海邊，見到有隻海盜船呀！

海盜船

 但因為想第一日簡單行左市中心先，所以冇俾錢上海盜船玩。

行到去port antico，在海旁一個甲板上休息影相，好舒服呢。

port antico

 之後求其搵左間餐廳食飯。

海旁有間叫做Cafe Bigo，有免費wifi兼今日有special menu，兩個主菜加野飲都只係十歐羅，即時入去食囉。

我食左個pasta同roasted meat，好好味呢。

roasted meat

 食飽飽行去市中心，以聖羅倫大教堂為中心四圍亂行。

Cattedrale San Lorenzo

 熱那亞剛有個梵高展，不過已經下晝怕佢好早關門，所以又係冇去睇到。

熱那亞充斥住呢D小巷

行行下去到噴水池，見到旁邊有好幾個路邊攤檔，一向最鍾意睇呢Ｄ的我就衝左埋去，重買左一樽pesto呀！

pesto發源地就係熱那亞，去到熱那亞除左要食青醬意粉外更加要買返一支pesto，在當地小攤試食後俾錢，返到香港都覺得自己身處在意大利呀！

噴水池旁

之後四圍行，去到St.Peter's Church，參觀完又行返去port antico買生果同買野飲，然後返酒店休息一陣。

是晚在酒店附近食晚飯，在意大利食pizza真係最抵，食飽返酒店zzz，準備聽朝一早去五漁村。