26-9-2010 精彩水舞間

早前亞媽話好想睇水舞間（佢唔係從電視廣告得知呢套野的，好神秘），咁去旅行社買package去玩兩日一夜啦。

旅行社包一張380的門票，是次住駿景酒店，搭金光飛航，哈，新嘗試，我未試過住氹仔的。

<--酒店房景對住馬場


放低行李就出外搵食，求其在酒店附近搵左間小食店食粥同腸粉。

<--叉燒腸，好滑好好味～


我比較鍾意食地道野呢～呢餐大家都食得好開心。

食飽飽，問問當地人點樣去路環個媽祖像，當地人教我地搭的士係最好，但佢加多一句：咁曬去媽祖像…不過你地係遊客，都可以行下既。

哈哈哈哈…

去搵的士的途中望過地圖，見酒店隔離原來係四面佛，咁近就行過去睇下啦。

<--四面佛


影完張相，上左架的士話要去路環媽祖像。

個司機再三確認係咪去路環（乜野事呀？咪話係囉），佢又話要上山架喎（我知架喇），之後話山上冇車架喎（唔…咁點呢？）。

司機話可以等埋我地，但要加二十蚊兼唔落標。

算啦，去旅行呢Ｄ數我都唔會計，反正四個人，除開四份都可以接受。

就咁樣我地就上左的士去路環個媽祖像。

沿途個司機係咁鬧而家的澳門經濟，派錢害死人等等…

似乎每個地方對自己的政府都會不滿。

話咁快就去到媽祖文化村。

<--媽祖文化村


呢度超少遊客，非常難得。

<--真係冇乜人架

<--606又出動喇


呢個景點在山上，風景優美，如果唔係怕個咪標不停咁跳，我會留耐Ｄ。

行完媽祖文化村，我同母親大人行上去睇媽祖像。

由文化村上媽祖像要行一條斜路的。

<--五分鐘左右去到

<--呢個就係媽祖像


山上風景極靚，風和日麗，涼風送爽，我其實真係唔想走呢。

<--媽祖像遠望路環


睇完媽祖像，上番的士去官也街。

其實官也街都好近我地酒店，我地呢個路線係兜大路，但冇所謂啦。

<--官也街


去到官也街，人山人海。

真係唔想行呢…

官也街的食物亦越來越貴，我食左個木糠雪糕，他媽的28蚊！！！

離開官也街，在附近閒逛，竟然見到我近日最愛的frozen yogurt！！！

抵食過木匡雪糕Ｎ倍！！！

買左Ｄ紐結糖，搭33號巴士回酒店。

順帶一提，大利來記依然排晒長龍，乜野事呢？真係咁好味？

放低Ｄ野，沖一沖身，就搭的士去威尼斯人。

<--幾靚


威尼斯人確實金光閃閃，不過我對人工野興趣唔算非常大。

<--大運河


去到威尼斯人，基本上除左佢地個food court外你唔會搵到其他野食（好可憐），所以我地在food court叫左少少野食。

食左個Nachos，45蚊，亞爸叫左個燒味飯，ＸＸＸ要75蚊（ＸＸＸ可按自己喜好填字），亞媽買左個麵，好似都要50蚊。

發癲架…

澳門平靚正的食物去晒邊？？？

食飽，行左威尼斯人的賭場一轉。

好恐怖，點解可以成萬蚊咁拎去賭？

我輸廿蚊都肉痛，所以今次我一蚊都冇用過來賭。

之後搭shuttle bus過去新濠天地（其實可以直接由威尼斯行過去，但我地似乎行錯方向，所以變左要搭shuttle bus）。

<--新濠天地


去到新濠天地，先排隊換水舞間的門票，跟住再排隊換龍騰門票。

龍騰係一場免費的天幕表演，大約十分鐘，都幾精彩。

我地在新濠天地行左一陣，七點鐘睇龍騰，免費表演來說，算係幾精彩。

睇完龍騰，慢慢行過去水舞間的表演場地。

今次我地係分別坐第一二行，坐在最側邊的位置。

水舞間的表演真係非常十分精彩，個人認為非常抵睇，如果有錢可以買680門票，位置較好，而且真係會值回票價。

成場表演我明白乜野叫做拍爛手掌，我拍手拍到手痛，但因為實在太精彩，一定要繼續俾掌聲表演者。

場show講乜可以睇番佢個官方網頁。

睇完表演我地搭shuttle bus去澳門半島，然後轉巴士去沙梨頭食宵夜。

細龜結業了。

六記超級多人，侍應做到黑晒面。

在六記坐下，叫左幾個菜。

好懷念過去的澳門呢…

食飽搭33號巴士回酒店睡覺。