31-1-2011 第一日的吳哥日落

凌晨三點起身，三點半搭的士去機場。

LCCT凌晨時份都好熱鬧，餐廳都好似廿四小時open，去到機場，check in完，在麥記食個早餐先。

6:45a.m.搭機去柬埔寨，去到暹粒8:15a.m.（當地慢馬來西亞［即係香港］一個鐘）。

暹粒機場雖細，但好有特色。

落機後排E-visa條隊，好快就過左關，拎埋行李，離開機場就見到有個司機舉住我個名的紙牌。

好威呢，我從未試過被人舉牌接機架，哈哈…

其實呢個係我所book的guesthouse安排免費tuk tuk接機。

未上tuk tuk，司機已經開始兜生意，拎晒旅遊書叫我地之後book佢架車，佢可以做埋導遊幫我地安排行程云云。

傾左一陣，司機話車我地去到guesthouse先再研究行程。

<--Tuk Tuk，不過唔係我地所book的o個架，我地架靚Ｄ


今次我book左的旅館叫做Rosy Guesthouse，自從hostelworld book左之後，當地職員已經主動E-mail同我聯絡，問的所有問題都好仔細咁回答，印象極佳。

<--旅館小貓Brenston，超級嗲人，我日日都幫佢抓癢的（旅館有另一隻金毛尋回犬，又係好可愛，但我掛住玩貓冇幫隻狗狗影相）


去到旅館未有房，我地同職員商量行程，決定今日先join local tour去Tonle Sap Lake，之後book司機去買吳哥遺址3-day pass，再入Angkok Wat睇日落。

溫馨提示：相信旅館職員好過信司機，我地的行程安排、book幾多日guide、參加邊個local tour都係同職員研究，司機叫我地慳錢唔好book guide同唔好參加local tour，事後發現佢的建議應該唔夠旅館職員的意見好。

經旅館職員book local tour，USD27一人，由十點玩到下晝兩點，包午餐、Tonle Sap Lake入場、小艇、導遊、小巴來回…

好抵玩。

<--旅館common area有桌球玩


在旅館同貓貓狗狗玩左一陣，上一陣網，就有車接我去local tour了。

成個團得四個人，導遊好後生，廿二歲，佢話佢賺緊錢讀大學，柬埔寨大學學費一年原來只需USD360，不過唔係好多人讀。

我地先去一個類似博物館的東西，了解一下Tonle Sap Lake的環境，跟住就去碼頭搭船了。

回香港睇資料，我地應該係去左Chong Khneas--最近Siem Reap的一邊湖。

我地由碼頭沿住一條窄水道出去大湖，期間會見到水上警察局、教堂、學校…非常有趣。
更特別係會有快艇駛近，跟住會有小朋友跳上船叫我地買野。

<--小朋友買汽水


小朋友身手非常靈活，跳上船賣完就會跳番落快艇，然後再跳去另一架船繼續賣汽水。

十多分鐘後去到大湖了。

<--漁民

<--好多小朋友呢


我地去左湖中的一個鱷魚場，期間會有小朋友拎住蛇行過來，如果你影相，盛惠一美金。

<--呢張相好貴架！


其實我都未影相，一拎起部相機已經被小女孩的屋企人追住拎一美金，如果我知道要錢，我連相機都唔會拎出來，唔係我覺得唔值，而係此風不可長，唔可以利用小朋友做呢Ｄ危險事的。

睇完鱷魚，我地坐船去另一架大船食午餐。

船停泊在湖中，我地可以在船上的吊床訓覺，亦可以上船頂曬太陽，午餐會對住一望無際的大海（其實係湖，但真係望唔到邊際），呢餐午餐真係非常難忘，非常享受。

<--我的午餐fish & chips


食飽飯抖一陣，就要離開了…

去完呢個湖區，即時明白點解Ｄ人會留在暹粒咁多日，因為單係Tonle Sap Lake，如果時間充足，絕對應該留耐Ｄ睇下佢的雀鳥或體會當地船民的生活。

Local tour後回旅館休息，跟住搭Tuk Tuk去南門買3-days pass。

我地四點幾去到排隊，買完就去Angkok Wat睇日落。

下晝五點後入吳哥窟係免費的，所以好多遊客第一日買完門票都會去呢度睇日落。

<--吳哥窟入口

<--成日見到的吳哥窟


去暹粒前其實分唔清楚吳哥窟各寺廟，今次去到先知道係點，其實暹粒有好多吳哥的遺址，我地成日話去吳哥窟，其實只係吳哥遺址的其中一個，亦係最出名的景點，吳哥遺址門票分開一日、三日同七日，今次我地只係留在暹粒五日，所以買左連續三日的門票（佢有另一種門票係一星期內任選三日參觀），門票已包括絕大部份吳哥遺址的入場費，而有另外幾個較偏遠的景點則要另購門票。

襯太陽未落山，我地在吳哥窟行左一陣，跟住搵左個位坐低睇日落。

<--在暹粒第一晚睇的日落


其實…冇乜特別…

睇完日落，我的病情嚴重了，所以冇去old market，只係留在旅館食晚飯，另外打電話回港問問claim旅遊保險事宜，亦向旅館職員查詢當地邊度睇醫生會比較好，我應該要睇醫生了…