1-10-2009 國慶返北京

好幾年無跟團去旅行，十一國慶連中秋節長假期，自遊行package太貴，唯有向現實低頭，以2699超值價錢返北京玩番五日四夜。

是日下晝五點機，但要兩點半去到機場，天啊，等等等等等（詳情省略）…去到北京酒店已經係晚上九點。

國泰航空的飛機餐認真麻麻，所以去到北京我同母親大人都即刻衝去出面食野。

 酒店大床

去北京前知道北京有條簋街，越夜越旺，所以搭地鐵去位於地鐵北新橋站的呢條食街食我地北京的第一餐。

順帶一提，導遊話十一呢Ｄ時節，王府井小食街會全部關門冇野食，有冇人知係咪真架呢？（我其實真係唔係好信）

去到簋街，成條街都係食市，我地行到一間有外國人幫襯的餐廳食野。

就係呢間小漁山

叫左三個餸，嘩，辣到痴線，乜北京菜係咁辣架？

呢碟野我食左一啖就收皮

即時啪番罐王老吉，唔係實返唔到香港。

佢地連煮菜都會掟好多辣椒落去，真係估佢唔到…

食飽，搭地鐵返酒店。

話說由我地酒店去簋街係要由10號線轉去5號線，咁返去就由5號線轉番去10號線啦，當我地去到轉線站月台等緊車時，突然有個亞姐走過來話冇車。

天啊…

十一點三冇車？點解冇廣播既？同埋點解對面線重行緊既？

我地即時出閘上路面截的士，當時其實都有唔少人等緊搶的士，不過我地都算非常幸運地截到的士返到酒店。

咁就一日。