可以訓晏Ｄ，好開心！
成十點幾先離開酒店，首站去潘家園舊貨市場。
潘家園類似跳蚤市場，聽聞星期六日更精彩，有好多古靈精怪野賣，我最鍾意睇呢Ｄ野，所以選擇星期日去行一個圈。
潘家園入面有舊書舊畫玉石等等，我睇得非常開心。
幾蚊一本的舊書，有Ｄ書舊到揭一揭都爛
其實我有睇中野架，但太貴唔捨得買，而我又唔係好識講價，所以冇買到。
呢隻貓碟好靚，要八十蚊，另外Ｄ鎖亦好特別，但要六十蚊以上
行到十二點幾，去食北京填鴨先。
今日有朋友幫我在大董book左位，佢話大董係最好味喎。
呢度就係大董
兩個人叫左一隻烤鴨，一個橙湯同一碟油麥菜。
好特別的橙湯
當隻填鴨做好，就會有個師傅過來片皮，片好後又會有個侍應過來教我地點食，幾得意。
好好味，雖然貴左Ｄ，不過都係一餐半餐，豪下啦。
之後搭地鐵，本來諗住去天安門廣場行去大柵欄，但原來地鐵封站，所以我地搭到隔離的西單站行過去。
既然去到西單，就去一去佢個書城啦。
超～級～大～簡直好似一個圖書館咁，雖然我依然未搵到我想搵的書，但我都買到一本咁大把。
睇左一個鐘，行去大柵欄。
其實本來唔想行去大柵欄，但呢Ｄ日子真係好難截車，冇辦法，唔行唔得。
行到去天安門廣場。
電視新聞成日見到呢個畫面
其實去到天安門廣場，長安大街呢Ｄ地方，我係會諗起廿年前。
以我的性格，廿年前如果我係一個住在北京的大學生，可能我已經死左。
所以去到天安門廣場，我並無絲毫興奮的感覺。
街上有人賣國旗，太過癮喇，忍唔住買番一支，一蚊一支細，兩蚊一支大，買左支大搖下搖下咁行，好好玩。
愛國的606
由於我冇地圖，所以我都係邊行邊問人點去大柵欄，幸好有一班志願者，我好多時唔識路都係問佢地。
就係呢班黃衫叔叔
其實跟住班人群行，就會去到大柵欄。
係呢度喇
大柵欄有好多老字號，行入去睇下影下相，都唔錯。
媽咪問：＂大柵欄係咪之前斬死人的地方呀？＂當時我完全冇印象，返到香港番Ｄ新聞先知原來我當日經過兩單傷人現場喎。
跟住睇書見到後海的銀錠橋好似好靚，所以想搭車去後海參觀兼食晚飯。
點知出左好大的意外。
地鐵封站，截唔到的士，唔知邊度搭巴士，所以我地搭類似＂tuk tuk＂的鐵皮車去後海。
上車前拎晒本書俾個司機睇，佢話識路，上到車唔知車左我地去邊，跟住話＂前面就係天橋喇＂。
真係想爆粗！老細，我拎本書出來同你講想去天橋？點解咁多條天橋唔去我係要去呢條？你係咪痴線架？
不過鬧來都冇用，即時落車搵的士吧。
上左一架，司機鬧我地話條路唔岩，佢呢個方向要去右轉云云。
喂，咁你咪轉囉！我有話你唔可以兜路咩？
扯火！
而家北京司機係咪真係咁唔憂做？係咪真係咁好生意？乜野叫做的士？以上的問題我真係好疑惑。
落車問Ｄ黃衫義工，佢地叫我地搭巴士，上左５號公車，點知又係錯左方向。
真係好depress…
搭一個站落車，搏多次截的士，好彩今次司機肯載我地。
幾經辛苦終於去到後海了。
呢度就係後海
專登行去銀錠橋。
銀錠橋
銀錠橋連接住前海同後海，聞說建於明朝，銀錠觀山係舊燕京十六景之一。
不過而家當然唔需要咁觀山啦。
後海兩旁係一堆酒吧，我亞媽當然唔岩啦，所以我地搭車去水立方影相，順面睇下附近有冇野食。
晚上的鳥巢同水立方係吸引好多。
彩色水立方
水立方加鳥巢
鳥巢
影完相，我地決定都係返簋街食飯。
去到簋街，本來諗住試下新野，但誤打誤撞又係去番第一晚去過的餐廳食飯。
真神秘。
不過今次我地好叻，全部野食走辣，兼唔飲茶飲王老吉，平左好多，而且試到Ｄ野食的味喇。
哈哈哈哈…
食飽飽，返到酒店都十點了。
聽日最後一日了。
沒有留言:
張貼留言