1-2-2011 發燒遊吳哥

病得好辛苦，成晚訓得好差，起身一定要去睇醫生。

今早約左個司機同個導遊去參觀吳哥遺址，但首站係要去診所睇醫生。

旅館職員交帶左司機同我地去邊間診所，導遊又跟埋我一齊去睇以便翻譯。

入到診所，已經坐住一對外籍夫婦，原來丈夫第一日遊吳哥就跌左落池塘整親隻腳。

醫生識講流利英文，大家溝通都冇乜問題，原來我發緊燒，唔怪之得我咁唔舒服了。

呢轉感冒睇左我133蚊美金！！！！！

好彩有保險公司幫我俾咋。

睇完醫生，食埋藥，就正式開始今日的行程了。

第一站去Angkor Wat，其實琴日睇日落已經去過，但今日跟住導遊去，導遊一邊行一邊同我地講歷史，又講好多神話故事，同琴日自己去爭好遠呢。

<--入口


吳哥文化受到印度影響好深，吳哥窟、或吳哥遺址的雕塑好多都有蛇、象、猴、神等等有關，我聽導遊講最多係巨人與神的決戰，為了長生不朽，巨人同神多年來鬥爭，最後當然係神贏左啦。

另外佢有好多石像係一身Ｎ頭動物，例如一身七頭蛇、一身九頭蛇、一身三頭象…

順帶一提，單數係好野，雙數係壞野。

<--一身七頭蛇


在吳哥窟入面會見到佛像，當地人仍然供奉緊架。

<--佛像


導遊解譯牆身的壁畫意思，如果我地聽司機講唔請導遊，一定只係到此一遊冇乜意思的。

壁畫內容有太陽神、月亮神、戰神…我笑說同希臘神話其實都係差不多，或者古代神話傳說大抵都係講相同的事，只係神的名字有所不同吧。

入到吳哥窟可以爬上其中一座塔，由於要對神的尊重，穿著背心短褲同戴帽係唔入得的（我中晒），不過好彩在吳哥窟外有小販檔賣長褲同絲巾，結果我逼不得已第一次購物。

<--上呢度要著過膝褲架

<--塔的外觀


參觀完吳哥窟，導遊帶我地去食飯，然後再去Angkor Thom。

導遊都算幾照顧我，沿途都會問我駛唔駛休息下，另外佢帶我地去飲椰青，佢話當年打仗冇藥，好多人都係靠飲椰青醫病，佢叫我一定要飲多Ｄ喎。

<--冰凍椰青


在吳哥窟會有好多小販檔，我印象最深刻係有一班小朋友捧住Ｄ紀念品來兜售，其中一個小朋友竟然o係我面前用普通話數1-10張postcard，一蚊美金，幫佢地買啦。

導遊笑說Ｄ小朋友識多國語言架。

食飽飯，去Angkor Thom。

<--Angkor Thom入口


Angkor Thom以前係一個城，入面兩旁應該有好多木屋，不過而家木屋遺址已經變左猴子天地，沿途有超級多猴子呢。

<--小猴子


進入Angkor Thom了。

<--Angkor Thom


再一次証明有導遊真係好緊要，佢帶我地左穿右插，有Ｄ地方冇佢我地帶我地去，我地肯定會錯過左。

由於生病關係，我好多時候都係行下坐下，同伴爬高爬低的同時我就同導遊吹水。

柬埔寨的小朋友有免費中小學教育，但唔係強逼教育，入讀大學的人唔多，因為讀左大學都唔代表會搵到好工，搵唔到好工Ｄ人就會開始懶…

後者同香港好似呢。

在暹粒見到好多小朋友，討厭港童的我都愛上呢度的小朋友，佢地真係好可愛，會同你玩，對住你笑，我見到一個小妹妹問我攞糖，當時我真係冇糖俾佢食，估唔到佢冇發脾氣之餘重對住我微笑。

太可愛了。

<--其中一個可愛小朋友


之後去參觀附近的Elephant Terrace同Royal Terrace就結束今日的參觀了。

<--Elephant Terrace


回旅館小睡片刻，跟住出去Old Market食飯。

Old Market、central market、night market同pub street都集中在一齊，我地在pub street搵左間食柬埔寨菜的小店食飯，食飽，行一陣night market就回去休息了。