好耐冇去旅行，被travel bug咬到死死下，在不能夠搭飛機的情況下去澳門頂一頂癮先。
是次澳門之旅入住銀河大倉酒店。
每次去澳門都係住平價酒店，第一次住呢Ｄ貴野，不過話貴，但由於我入住日期係星期日一，當平日計，只係貴過其他酒店少少。
由於下晝三點先有房，所以我今次都好晏過澳門，下晝一點坐金光飛航過去，去到氹仔都係兩點幾。
氹仔碼頭都開始方便，好多賭場都有shuttle bus，坐銀河shuttle bus去到Galaxy，由於未攞得房，先在購物大道行下先。
早午餐都未食，去food court叫野食，但真係幾麻煩，食市唔收現金，一定要買佢的咭然後再買野食，張咭面值一百至二百，食唔到咁多，煩得濟過左去麥記食個豬柳蛋漢堡。
食飽，去酒店check in。
大倉係新開酒店，服務其實唔錯，但攞房速度真係太慢。
酒店要求客人十一點check out，但聽聞好多人兩點先check out，所以基本上都執唔切房交俾下一個客。
上到房，嘩嘩嘩…正！我好少住咁大的酒店，所以第一個感覺係－酒池肉林。
唔理咁多，即時換泳衣去游水。
今次揀住大倉係為左佢個人造沙灘，聽聞可以玩衝浪。
不過衝浪前先上去廿九樓的室內泳池游下水先。
泳池冇乜人，所以游水游得好開心～游完再搭lift落二樓去人造沙灘玩。
是日天公造美，唔太曬，又冇乜雨，太好了。
人造沙灘每15分鐘會製造一次人工浪，不過比我想像中的衝浪都真係差左好多。
哈哈哈哈…
（因為我好專心游水衝浪，所以冇影到相，人造沙灘可以按呢條link睇）
玩到五點幾，返房沖涼梳洗，然後問職員點樣去賽狗場。
我去親澳門都話要睇賽狗，但次次都冇機會去，今次一定要去到！
職員教我地搭shuttle bus去關閘，然後轉巴士去賽狗場。
有shuttle bus真係好方便，但我諗澳門的士司機收入一定大減。
賽狗場入場費10蚊，七點幾都唔係好多人。
每15分鐘會有一場賽狗，跑的路線唔同，六隻狗比賽前先出場行一陣亮相，跟住困入籠中，哨子一響，電兔開始跑，過一陣就會放Ｄ狗出來跑。
其實真係幾刺激，速度快，你以為隻狗仔會輸？佢最尾20米都可以衝前架！
而且大螢幕的賠率其實都幾準。
難得去到澳門，一定要賭下，所以我買左十蚊獨贏某一場名叫＂金兔呈祥＂的狗仔（因為我鍾意金兔呢兩個字
），最後佢跑第二。原來如果我買位置就會贏錢架喇，嘩哈哈哈…不過我真係完全唔識賭。
睇左四場，然後出去食飯。
在狗場外四圍行下搵野食，去到一間叫坤仔美食的小店食飯。
是晚叫左鹹魚雞粒炒飯、金銀蛋筧菜同懷舊特式野雞卷加一罐可樂，大件夾抵食，埋單唔駛110！
當我以為澳門的美食已經被賭場化時，食到幾年前第一次去澳門的平靚正食品，真係大呼爽呀！
食飽，搭巴士去關閘再轉賭場車返Galaxy，行左一陣賭場（齋行唔賭），就回房zzz了。
沒有留言:
張貼留言