港龍真的很不錯，飛機餐非常豐富。
重有Haagen Dazs食呀～
今次坐飛機坐窗口位，飛機飛在雲頂的感覺真的很super human！
兩小時左右，終於去到上海了。落機過關後，第一時間衝去搭磁浮列車。
呢架野真利害，七分鐘由機場去到市中心，最高時速431km/h。當兩架車並列經過的時候，不需一秒＂o雪＂一聲就過左，非常不可思議。不過其實我懷疑有冇咁快，因為當個顯示話6x km/h時，其實真係幾慢，我老豆重話＂求其搵個人跑步都快過佢＂。
磁浮的總站在龍陽路站，我地可以選擇搭地鐵或的士，由於拖著行李箱，我地決定搭的士，點知一到上海就上左賊車。
一上的士，我俾個酒店地址司機看，司機看後勁同我吹水，又問我從邊度來，係咪旅遊，又話間酒店係五星級（其實唔知有冇三星）…
咁我就同佢吹兩句，點知入正題，呢條友開始露出狐狸尾巴，問我地要唔要發票。我梗係要keep番做証據，司機就話＂要發票就要貴點，不要發票就便宜點。要發票二百多，不要發票可以收你二百。＂
痴線，唔好去搶？之前看書話搭的士由機場去市中心只需一百左右，由市中心去市中心你收我二百多？
後來我才發現個司機冇落標，真係任佢開價。
冇辦法，唯有抄低佢的車牌，去到酒店先想辦法追究。
點知峰迴路轉，當我抄左個車牌後，個司機竟然停車話幫我地截另一架落標的士去酒店，重話那些的士只需約五十。
個司機落車後勁驚地問我頭先寫左Ｄ乜，重夠膽叫我拎出來俾佢睇，佢都痴線，我地即刻上另一架的士去酒店。
去到酒店，只需31蚊人仔，俾埋貼士先35，之前個司機咁飛禽大咬？
不過我覺得自己好精明呢，呵呵…
今次住華美國際，在西藏南路，酒店幾新幾靚，附近都幾多特別野賣，又近各旅遊點，推介推介。
先在酒店休息一陣，就開始出動四圍走喇。
酒店附近有一個花鳥市場，賣的野都真係幾特別，我見到有蟋蟀賣架！
由花鳥市場行行下，再望下個地圖，噢…行到豫園了。
豫園附近都幾多野賣，不過真的遊客價，我唔覺得值咁貴。
我地漫無目的地四圍行，竟然去到南翔小籠包的店舖，即時排隊買平平小籠包。
呢間小籠包排隊外賣最抵，12蚊有16粒，4個人每人有4粒，剛剛好！
小籠包皮較厚，但裡面的肉汁真的yummy，小食多滋味，況且要食其他野呢。
食完小籠包，我地就去了湖心亭影相，之後再行，去到豫園了。
不過當時已經是下午四點二十分，豫園關門時間是五點，所以冇入去，我地改去城隍廟。
其實城隍廟冇乜特別，不過反正來到上海，點都要去一去。
行完城隍廟，再行去上海老街，噢，賣的東西跟剛才走過的地方很似呢。
好奇怪，點解豫園呢個旅遊區竟然冇postcard賣的？
五點幾，原來已經天黑。我地走回南翔小籠包附近食飯，去到一間叫做寧波湯糰的店舖食飯。我本旅遊書有介紹這小店，但…真係幾麻麻。
叫左一碟叫做排骨年糕的東西，其實只是排骨加幾件年糕，呢個幾得意，可以一試。
食飽飽，見到豫園夜晚真的好靚，忍唔住瘋狂影相。
之後返酒店稍事休息。
七點半，出動食晚飯！
酒店附近真的很多野食，我地去到一條叫做壽寧路的小橫街，成條街都賣小龍蝦，嘩…口水流…
不過先抹一抹口水，我地行去雲南南路美食街看看有什麼東西食先。
咦？有一檔賣新疆羊肉串燒的排晒隊，我地梗係唔執輸排埋一份啦。
食完串燒，我地決定返壽寧路食小龍蝦。
我地選擇左好記龍蝦，因為佢有好多相貼左出來，我地估計佢應該最安全。哈哈…
我地叫左一斤小龍蝦同一斤富貴蝦（即係瀨尿蝦），瀨尿蝦並唔係椒鹽，而係好似用鹵水整的，好好味好好味呀～～～
食完蝦宴，唔夠飽，我地再返雲南南路美食街附近買粟子、炒河同刀削面食。
真係要推介呢個粟子，學黃麗梅話齋＂粟子好有粟子味呀＂！
食得好開心，估唔到上海之旅第一日會食得咁開心。不過今日發現名氣真係會害人，豫園內食店的食物同街頭小店差太遠喇…
沒有留言:
張貼留言