由清邁去清萊尚算方便，但時間有限，跟旅行團係最好的方法，團費大約泰幣千三（忘記了），包午餐連所有導遊加入場費，抵！
早上7:20旅行社職員到旅館接我地，跟住開始一日的行程。
首站坐一小時車去睇溫泉。
原來泰國都有溫泉，重會噴水架！
停留一陣，食返隻溫泉蛋，又浸下對腳（免費架），咁又上返車去第二站喇。
浸隻蛋來食下先，味道唔錯！
之前睇資料見到清萊有個白色廟宇非常漂亮，所以我選擇local tour時呢個景點基本上係必要的。
呢個temple係我第一次見到實物靚過照片Ｎ倍的景點，非常值得參觀。
white temple真係幾靚
廟內唔准影相，廟內坐住打坐中的僧侶，更有趣係廟內牆身有壁畫，我一路以為廟宇中的壁畫都係佛教故事，但估唔到裡面係孫悟空（龍珠o個個）、蜘蛛俠、叮噹…
導遊話寺廟好新，上網查資料發現寺廟建於1997年，難怪去到發現有部份地方仍然建築中…
white temple旁的恐怖樹
逗留在white temple半小時，都幾值得一遊。
之後搭１小時車去金三角。
金三角即是泰國、寮國同緬甸三國的交接邊境，一提到金三角就會想起毒窟，不過經過三國的經營，呢度已經變成新的旅遊點，最令我驚訝係緬甸在此地起左賭場，寮國都準備緊建新賭場。
左：泰國，前：緬甸，右：寮國
黃賭毒真係不能分割的好兄弟。
我地坐船遊金三角，之後更可以偷偷進入寮國境內，呢個邊境小地方有幾間封塵的小店，大家可以試飲蛇鼠昆蟲烈酒，不好杯中物的我隨便買一張postcard寄俾自己當搜集寮國郵票，本來以為呢Ｄ小村落都唔會有郵差經過，但估唔到一個月後真係收得到！
跟住食午飯，然後去泰緬邊境。
泰緬邊境
泰緬邊境其實係一個大型中國市集，賣的東西類似廟街同女人街貨色，不過我地都買左幾包茶葉呢。
最後去今日的重點行程睇長頸族了。
我地去的地方叫做Karen Village，長頸、黑牙、大耳、雲南過來的小數民族都住埋一齊，其實呢度比我想像中更遊客，我冇諗過有咁多族人住埋一齊方便遊客參觀。
長頸族
導遊話長頸族來自緬甸，因害怕戰爭所以去到泰國，是真是假無從稽考了。
玩完，搭三小時車返清邁，回到旅館放低行李，在酒店附近食個晚飯（泰國菜呀！），然後去酒店附近睇泰拳。
話說首晚到達清邁已經發現呢個泰拳stadium，晚上９點開始比賽，剛好今晚有賽事，400泰幣入場費就試下去睇啦。
泰拳中途休息，一場攪笑混合戰
由九點半睇到十一點半，一場比一場刺激，雖然我唔明賽例，不過都睇得好開心，其實十一點半仍未結束的，只係聽日要早起身參加另一個local tour，所以未睇晒都走了。
沒有留言:
張貼留言