由於上海的景點基本上我地之前已經去過，今日只是四圍逛逛，所以亦不用太早起床。
十點食飽早餐，再執好行李，放在酒店reception旁，便起行四圍走了。
其實上海在太陽下都好靚
走過熟悉的西藏中路，今日我話要食永和大王，所以我地一見到永和大王就走入去食粢飯、油炸鬼同飲豆漿，哈…不過半小時前才食過早餐咋喎。
往南京路途中見到沐恩堂，但…門外深鎖，找不到辦法入內參觀
食飽飽，我地再往南京東路行街買餘下的手信。之前在上海見到大白兔糖的廣告，我地就走入一間超級市場找尋大白兔糖。
原來上海的大白兔糖有玉米味，朱古力味等多款選擇，我地買了朱古力味，說實在，朱古力味竟然冇原味咁甜，非常好！
紅豆味、朱古力味、薄荷味…
606：朱古力味好好味！
上海人似乎真的很喜歡食甜及辣的食物，去食品手信店，非常多糖賣，而看樣子，一定甜到令人即刻患上糖尿病，所以我都不敢多買。（事後我証明那些糖真的甜得很利害）
走著走著，終於逛完整條南京路了，接著父親大人話好掛住小紹興的雞，我地就返去雲南南路的小紹興。
噢，今日小紹興人很多，而且餐牌的食品亦少了，想不到食什麼，決定求其過隔壁的餐廳食飯。
嘩，呢間野真係…食物又細碟又貴，最重要係唔好味！所以有時真係要信信旅遊書推介的食店呢。
求求其其食少少，我地又走回龍蝦街食賴尿蝦，兩斤四個人食，非常惹味！
食飽飽，擔心市區塞車，早點去機場。我地先乘的士，再轉磁浮（酒店職員及的士司機的力勸我地一乘的士往機場罷了，但遊客，梗係要玩下新野啦）。
早了三小時到機場，地勤小姐話幫我地改早機回香港。
606：救命呀！
原來改早了的飛機都delay，最終上機時間跟我原本所乘的起飛時間差不多。
後來才知中國唔知邊度有軍事演習，所以全日飛機都delay。
等待搭機時順便看日落
上海蒲東機場可能只有很少停機坪，好耐冇試過要搭巴士接駁往客機了。
在停機坪上影其他飛機
上海之旅總算結束，我對上海的印象還好，只是有點兒污糟，即使是旅遊區，隨地吐痰亦五步一聽，十步一見，最最最恐怖是垃圾桶口亦會吊住幾條口水痰，我拋垃圾時就好像去了歡樂天地一樣離遠拋入，更怕垃圾反彈回自己身上，極之驚嚇。
上海的電視節目的幾好看，有一晚我地在酒店看電視，講一名女子哭訴被老公拋棄，看得非常投入，重同節目主持人一齊鬧個男人（好白痴）。
上海夜景幾靚，野食好味，但其實駛費不如我想像中便宜。
中國開始受通脹影響了，北上消費似乎開始唔再抵。
最開心係今次旅行駛費有人包，哈哈…多謝晒呀！！！
沒有留言:
張貼留言