今次坐國泰8:50a.m.的客機，我地8:40a.m.才剛好去到閘口，繼兩年前的希臘之旅後，又一次要勞煩地勤姐姐衝來接我地上機。
今次班機都幾唔full，途中不少乘客都有調動坐位（包括我地），而家果然係淡季呀！
兩小時左右去到胡志明市，一出機場先去換錢，越南錢同港紙兌換簡單化地計作2000:1，突然有幾百萬身家，好過癮！
最初我已經睇晒資料知道要坐邊種的士，一出機場見到有兩個的士站，全部都冇我想要的兩種的士，見對面馬路有，即刻衝過去，可惜保安員話唔准o係呢度坐車，要去的士站喎。
唉…被人按住來搶，冇計！明明上車前講好計咪錶，一開車都同你講USD10！
豈有此理！
是次住在REX Hotel，四星，服務一流。
間房都幾靚啦
Settle down後，打個電話俾越南通先生，特此真係鳴謝一下，呢次越南之旅佢真係幫左我唔少忙。
我地決定去Pham Nhu Lao搵旅行社報後日的local tour，不過之前先去醫下肚先。
在街邊見到有婆婆賣呢d格仔餅，買左包來吃。
甜甜地，幾好味
我地去左pho 2000食牛肉河，呢間野克林頓都有幫襯過，好多老外都影呢張相呢！
鎮店之寶
每人一碗牛肉河，ok啦，冇乜驚喜。
牛河
之後行去Pham Ngu Lao，我亞哥話報Sinh Cafe幾好，咁我地去問下價啦，嘩，個亞哥勁冇禮貌，佢個價錢又勁貴，即時怒撇！
我地去了對面o個間Pu Ta報後日去Mui Ne的團，USD55一位全包，其實呢條街好多間旅行社，不過我地都懶得夾價了。
呢間有禮貌得多
呢條街好似冇乜野行，於是我地搭的士去History Museum打算看水上木偶。
去到History Museum，佢話今日close，問門口個亞叔幾時有得睇水上木偶，佢話聽日上晝9,10,11點，下晝2,3點都有得睇，我地話預先買票，亞叔又話唔駛（原來係個局，後解）。
呢度附近又係冇野睇，我地行行下，見到隔離有個動物園，入場費只係VND8000，咁平，入去睇下啦。
動物園地圖
呢個動物園簡直係一大驚喜，超精彩，而且又夠大，我地玩左差不多兩個鐘先走。
點解會同level咁影到長頸鹿？因為在籠外係有個小高台架！
睇完長頸鹿，見到有人帶兩隻大笨象散步喎。
開心地散步
第一次見到有象牙的大笨象。
wow，我有牙的！
動物園有將動物分類，包括草食動物，貓科動物，爬蟲類，猴子等等。
睇完長頸鹿同大笨象，我地就沿指示牌去了草食動物區，呢個區係在籠上面搭了條橋，我地由上至下咁觀察小動物。
我地開餐呀
點解你冇左隻角的？
好好笑，竟然在動物園見到一隻在籠外的貓。
你小心d呀，入左猛獸籠你就命都冇架喇！
有好幾種動物我都係第一次見，包括鷹，交配中的蜥蝪，水懶，大肚的豹等等。
好英的鷹，但我覺得佢個樣有點恐怖。
你睇下佢個肚幾大！
Reptiles區太可怕喇，所以我一張相都冇影到，我只係一路行一路話，嘩，好核突呀，嘩，好恐怖呀！！！
跟住行到去一區專門放bb動物的地方。
bb棉羊好可愛～
佢有好多隻唔同種類的bb四圍跑，有隻bb鹿／羊？走過來嗲人，超得意～
之後我地去左隔離的水獺區。
眼神動作一致
原來水獺係好過癮，佢地的叫聲似bb，當時我地見到有一隻水獺剛由水上爬番上去水懶朋友堆中，呢堆朋友係即時跑去歡迎佢架喎。難怪站在我附近的外國小妹妹同佢爸爸講，不如養隻水獺做寵物啦。
之後行行下，見到一隻大黑熊。
我有玩具玩的！
呢個動物園俾我的感覺良好，我去過Insbruck同廣州的動物園，越南雖然俾人的感覺落後，但呢度的動物起碼係乾淨同肥，個籠又夠大，暫時我最鍾意係呢個動物園。
由於今日太早起身，我地行完動物園就返左酒店休息一陣，夜晚去檳城市場食街邊檔。
我真係好鍾意食街邊野，所以呢餐風味餐，簡直係我的最愛！
去到越南點可以唔食春卷？
串燒
個人最愛的燒魚
我地叫左五個菜加兩罐汽水，都係港幣一百蚊多少少，食得真係好開心呢～
食飽飯，返酒店的路途中見到一間雪糕店，食左隻香蕉船，加埋在檳城市場買左個牛奶果返酒店食，哈哈…係咁食，想唔肥都難。
沒有留言:
張貼留言