o係你失眠到零晨5點先訓得著的情況下，最討厭係7點鐘會morning call，我可唔可以今日唔跟團呀？
在旅遊車度喪訓，但我還未塞實耳仔聽歌訓覺時，聽到導遊先生係咁話北京好好，發展好好，中國繁榮………
突然就去到頤和園。
頤和園
其實去到呢Ｄ地方我係好想自己一個人慢慢行下hea下影下相，但可惜跟團，好多時影完到此一遊後就要走。
昆明湖
在導遊講解歷史時，我就走左去附近影下相。
熱心的導遊又問大家有冇問題發問，當大家冇野問時導遊就拋下一句：大家來到都只係影張到此一遊的相就算。
well，其實我都聽到唔少次導遊同各位講＂大家o係度影番張相，跟住我地去下一度＂。
長廊橫樑圖畫
好快咁行完唔知邊度（唔知點解跟團我係唔記得自己去過邊度），就坐船遊昆明湖。
其實真係非常唔特別，只係好多人坐隻船由一邊去到另一邊。
在船上影山上的……
行完頤和園，食午飯。
哈哈哈哈…十一點半咋…
跟住去紫禁城。
故宮外貌
我地又要跟住導遊行，聽佢講歷史。
超鍾意呢張獅子壓獅子
導遊先生的重點係睇故宮入面的珍藏，但其實我的興趣不大，所以佢講解時我都行開左去睇野影相。
最後參觀宮殿，六十周年國慶果真非同少可，每個宮殿門口都擠滿晒人，一向唔鍾意同人逼的我自然會行開，點知導遊對我講：＂多人就唔睇？o黎到做乜唔睇？＂
點解要逼我做一Ｄ我唔想做的野呢？點解唔可以尊重一下每個人的旅遊習慣與模式呢？點解你覺得好睇的野就一定係好睇呢？
大惑不解。
睇戲成日見到呢個畫面
去完故宮，行去參觀胡同。
其實去北京我最想睇的首選長城，第二就係胡同。
旅行團安排我地坐人力車遊胡同，去到呢個胡同我有少許失望，係咪我之前想像得太美好呢？我幻想世界中的胡同係住左好多人，有班小朋友在小巷跑跑跳跳。
人力車伕
坐完人力車我地就去對面馬路的南鑼鼓巷。
胡同外的正宗北京狗
南鑼鼓巷
南鑼鼓巷有好多間cafe，即時令我諗起早前鼓浪嶼hea爆之旅，其實幾想坐低嘆番杯咖啡寫下日記，可惜呢個景點只有半個鐘…
半個鐘…可以行乜？
在南鑼鼓行中某小店見到一隻鴛鴦眼白貓，睇書就睇得多，但我未見過真的雙色眼貓。
不過小貓幾污糟，飲水只係開個水喉俾佢飲兩啖，唉…
南鑼鼓巷的可憐小貓
跟住食晚飯，當時係五點幾…
食完晚飯去王府井，我同母親大人決定唔跟車返酒店。
終於可以慢慢行喇。
去到小食街，其實我係幾鍾意掃街食野。
王府井我見到有兩條食街，一條在馬路邊，另一條在步行街內，食街有好多幾得意的野食。
例如，一寸郁緊的蠍子，同埋我細個曾經見過的吹糖（我唔知其實佢叫乜名）。
呢個男人可以吹到唔同公仔的糖出來架
我記得以前細個買過一支小雲（ＩＱ博士個小雲呀）來食，好好味，不過而家Ｄ病咁嚴重，佢吹完我都真係唔敢食。
在食街內我重見到有人表演。
係京劇定粵曲？
及後路經王府井書店，嘩，超大，可惜距離關門只餘下十五分鐘，完全唔夠時間睇。
行到書店關門，諗住截的士返酒店。
點知截左半個鐘都截唔到，司機唔係話唔識路就係連停低都唔肯。
乜野事呀？呢個係乜野地方？
截車截到有Ｄ扯火，我地去到的士站諗住等車，點知個security同我講而家冇的士，咁你放個的士站的牌出來做乜？
就算有車，都要同人爭，當你行緊去部車度，Ｄ人就會跑，乜野事呀？奧運過左成年喇喎。
苦無辦法之下行左去GRANT HYATT試下問職員幫我地截車，呢度真係要讚一讚GRANT HYATT的職員，我第一次感受到北京辦奧運時經常播的歌＂北京歡迎你＂的意思。
終於上到的士，而個司機又出奇地有禮同健談，同佢傾計傾得好開心，司機係北京的農民工，一路開車一路介紹北京的景點。
呢Ｄ先係劉華所講的待客之道囉。
好彩GRANT HYATT的員工同農民工司機，令我對北京有個唔錯的印象。
沒有留言:
張貼留言