餐廳在頂樓，食飽可以睇風景，真好！
同行者自昨日開始有喉嚨痛，於是食完早餐後去了附近藥房買藥，本來諗住買喉糖，但溝通不了之下個pharmacy嬸嬸拎左盒百幾蚊的藥出來，話醫喉痛好喎。
冇計，俾錢，不過俾完錢後我地先搵到使立消，咁百幾蚊冇理由唔食架，睇左說明書，嘩，可以醫肺炎咁勁？食左佢個份量後，我先發現呢盒藥原來係抗生素！即係最少要食夠五至七日，中晒招！（後話：佢食到返香港都未好番！）
我地由酒店行去聖母教堂同隔離的中央郵局影相。
藍天白雲下的教堂
郵局正面
我地在郵局寄postcard，再買少少紀念品，就搭的士去History Museum準備睇水上木偶。
郵局內
頂！去到History Museum，個售票員話今日冇得睇，最快要星期五先有得睇喎！琴日個亞叔明明話今日有幾場架！
激死我！
於是我地去統一宮附近的Tourist Information Center問下邊度有得睇水上木偶，職員非常友善，幫我地book埋位睇夜晚6:30木偶show，終於有得睇了！
既然去到統一宮，諗住入去行下，點知佢又話要下晝1:30先開門（當時係11點幾），睇台灣旅遊書，我地決定去Fine Art Museum看看。
Fine Art Museum
呢個Fine Art Museum真係日久失修，冇乜特別，所以好快行晒。
同伴話去到HCMC，一定要睇下西貢河喎，於是又搭的士去睇下啦。
一望，同行者個樣失望到極點，哈哈…你唔係expect佢係塞納河、萊茵河咁樣呀嘛？
西貢河
之後往Sheraton方向行，又差不多返到酒店了，在酒店附近搵了間餐廳食飯。
呢餐經典了！
同伴誤食以下的青辣椒，痛苦長達十分鐘。
呢隻係乜辣椒？
雖然好冇人性，但我真係忍唔住笑，睇住佢流晒眼淚，搶走我杯冰可樂狂飲，但都至唔到辣，waiter哥哥睇唔過眼，過來俾左杯熱茶佢飲。
佢抱住懷疑的態度：咁熱點飲點止辣呀？不過無法可施，唯有照飲。
幾分鐘後佢恢復正常了。
哈哈…原來止辣係要飲熱茶的！
睇下隻札肉拆開後個size爭幾遠
飯後又返酒店休息一會，因為我地都唔知胡志明市重有乜野行（未想去買手信住），我地在酒店上網看tripadvisor的意見，準備行Dong Khoi、Dong Du、Ton That Thiep、Ton That Dam、Ho Tung Mau呢幾條街。
不過又係冇乜特別。
於是提早去行下檳城市場，明知被騙之下買了第一對民族鞋。
檳城市場
唔買喇，費事聽日去Mui Ne拎野麻煩。於是我地再睇旅遊書，決定去另一個市場－Cho An Dong。
去到Cho An Dong，完全體會到乜野叫做O嘴。
即時有兩個感覺：
一，搭車走。
二，以後唔會信台灣旅遊書。
我地決定再返聖母教堂附近，睇下有乜野做（話晒旅遊區嘛）。
咦？竟然見到有人拍戲喎。
呢兩個女主角都幾靚
我地行去附近的Diamond Plaza行下，睇下越南賣的名牌同香港爭幾遠。
行到累，去樓下坐底飲杯咖啡。
有點似香港的pacific coffee的hinglands coffee，有好多間分店
越南咖啡果然出名，真係幾好味。（因為我鍾意飲甜咖啡）
好味道
坐到六點，行去睇水上木偶。
水上木偶門口
呢套野係用越南話做對白，睇約五十分鐘，雖然聽唔明，但都覺得好精彩。
呢個水上木偶係分好多個故事，d木偶會在水上做出好多高難度動作，但你係睇唔到佢點控制架喎。
表演完後，在簾後的木偶控制員就會出來同大家打招呼。
好強的表演者
呢場show太吸引喇，只係USD4，超抵睇！完場後我都忍唔住要買番隻木偶公仔返香港玩！
之後去了Temple Club食飯。
好出名的Temple Club
呢間野LP有介紹，本來已經出名，但經過Brad Pitt同Angelina Jolie食過之後，更加出名。
好彩有越南通幫手訂位咋！再一次多謝你呀！
呢間餐廳算貴了，但都只係香港價，是晚食了大約港幣三百幾，去旅行總係要豪下的！
食到好飽，跟住行返酒店pack行李，準備聽日去Mui Ne了。
沒有留言:
張貼留言