26-5-2012 去廣州都算係去旅行了

都好幾年冇去廣州了，今日下晝收工就過紅磡搭直通火車上廣州玩兩日一夜。

2:47p.m.火車，上到廣州東站4:52，今次住寶軒酒店，位於解放南路與大德路交界，地鐵海珠廣場站。

寶軒酒店，位置方便，唔錯啦

 網上訂酒店連稅四百幾，因為同亞媽去，所以住好少少，如果自己一個人我會住平Ｄ。

先去酒店放低行李，跟住行過去酒店對面的鞋城。

因為落雨的關係，亞媽話想買返對鞋，不過亦由於太晏的關係，舖頭都開始關門，而鞋城的鞋其實又唔係太平，所以算數。

跟住過去萬菱廣場，呢度係做批發的，但係六點幾又係開始收舖，求其行左兩層，亞媽終於買到對１５蚊人仔的ＲＯＸＹ拖鞋，哈哈哈哈…

行左一陣，去北京路了。

其實應該行到過去北京路，不過又係同一句，帶亞媽行無謂亂搵路，我地搭一個站地鐵去到了。

已經好幾年冇行過北京路，好多香港的舖頭都有廣州分店，例如松記、五代同糖同Ｇ２０００。我地簡單地行左一圈，然後求其搵間食市食腸粉同陳村粉，媽呀～我去到廣州係唔可以唔食陳村粉的！！！


青宮電影院好個牌砵蘭街feel
食飽飽，行下北京路的新華書城，唔吸引，跟住佢附近開多左間四層高的書店，入面的設計同書的種類都比新華書城吸引得多了！

再行下醫療用品店睇下有冇特效藥賣，哈哈…職員介紹噴霧止痛劑，話對肩膊痛有神效，通常呢Ｄ神效東西我都係唔敢用的。

乜都買唔到，回酒店睡了，明早一早要去飲早茶呀！