點解有叫聲？係乜野叫聲？
聽左五分鐘，呢Ｄ應該係翻雲覆雨叫聲，同場加插花灑聲同撞牆聲。
天啊，我明明唔係住時鐘酒店，點解會咁？女人聲嘶力竭地叫足半個鐘，我終於忍唔住出去睇下叫聲來源，開頭以為係隔離房，原來叫聲來自旅舍的公共浴室。
由於開始作病，唔小心咳左一聲，叫聲終於停止…
我地房對正大戰場地，同伴從門隙見到一個外藉男士（？）由浴室走出來。
打擾你地好事，唔好意思，但下次你地可唔可以叫得細聲Ｄ？
第二朝九點起身，又出左去飲早茶。
點心嬸嬸係咁叫我地食帝王包，問極都唔知係乜，嬸嬸冇我地咁好氣，拎左個包放低剪開就走人。
原來係大包入面包住糯米雞，好特別呢！
食飽飽，回guesthouse買明日去KL的車票，跟住準備搭車去極樂寺。
檳城除左George Town外，其餘景點都頗遠，昨晚認識一個上海女孩，佢約我地一齊去spice garden，不過我同同伴商量都係先去極樂寺，夠時間先去埋spice garden。
昨日行左好多個鐘，今日對腳好痠痛，我地選擇去極樂寺又一次挑戰我的體能極限。
極樂寺係一個佛教寺廟，去到要行少量斜路同大量樓梯，一路行我都一路處於半斷氣狀態，幾經辛苦終於爬到上去。
去到極樂寺前先見到有個涼亭，涼亭的水池內有過百隻大烏龜。
其實咁多隻烏龜疊埋一齊真係幾恐怖。
極樂寺建築幾靚，值得一遊。
我地搭纜車上觀音寺，從呢度可以遠眺檳城市的風景。
不過最攪笑係觀音寺前的小石像，我估唔到會咁…幽默。
呢堆野有幾隻係呈現跪姿，面向觀音像，真係估佢唔到。
從觀音像遠望隔離有個寶塔，有遊客行左上去喎，於是我地都行過去寶塔睇下。
已經腳痛，每行一級樓梯對腳就重左一公斤，行左五分鐘，終於上到塔尖。
其實我係畏高的，腳震震咁影左幾張相就即閃。
行完極樂寺，大家都唔係好肚餓，所以只係在山下食左杯雪糕，跟住就搭巴士回George Town。
回旅舍休息一陣，其實都唔夠時間去spice garden了，所以我地選擇去近少少的臥佛寺。
曾經在曼谷睇過當地的臥佛，臥佛其實係佛祖臨終前的姿勢，今次再想睇多個臥佛，係因為想睇下佢對腳。
以前睇過一篇文章，講臥佛的腳並唔係合埋，代表世界仍未大同，當時我在曼谷睇的臥佛對腳係合埋的，所以我好疑惑，為左對腳，睇多個臥佛啦。
咁究竟文章所指的孰真孰假？無從稽考了。
臥佛寺對面係一所緬甸佛寺。
論宏偉，臥佛寺略勝，但論多野睇，緬甸佛寺就真係唔可以錯過喇。
參觀完佛寺，又係時候食野喇。
本來想搭巴士去Gurney Drive夜市，但等左好耐都冇巴士，所以都係行路。
由佛寺行左近半個鐘，去到一個叫做Gurney Plaza的大型商場，入去涼下冷氣先。
呢個商場最大的收穫係買到初戀紅豆冰的ＤＶＤ，香港搵左好耐都冇，今次終於買到喇！
由商場行大約五分鐘就去到Gurney Drive Night Market，呢個夜市我在台灣旅遊網站都見過好多去檳城玩的人都會去呢度食野的。
去檳城前朋友話一定要食叻沙，所以專登叫左一碗食。
原來叻沙係又酸又辣的…其實真係唔太岩我口胃…
之後食左碗粉、魷魚、腸粉、粟米…最後食埋麻芝就走喇。
搭巴士去到guesthouse附近，回去休息一陣，跟住又出去食野。
在旅舍見到上海女孩，佢話spice garden超好玩，可惜我地聽日就走，真係冇時間去呢。
至於食野方面，Gurney Drive的野食，個人認為冇我地住宿附近的小食市咁好味，最後一晚在檳城，今晚一定要食到盡。
我誠意推介魚丸米粉同另一檔叫Old Trafford漢堡包小檔，真係好好味～
食飽，回去執行李了。
沒有留言:
張貼留言