今日一早起身去南怡島。
由首爾去南怡島，要先乘地鐵去清涼里站，再轉火車去加平，之後搭的士去碼頭，坐埋船就到喇。
哈哈…
有兩個地鐵站都叫做清涼里，搭去中央線（淺藍色）的清涼里站，火車站正正在隔離。
坐左近兩個鐘車終於去到南怡島，到南怡島前我只知呢度係韓劇冬季戀歌的拍攝場地，不過一向好少睇電視的我，去旅行前根本唔知有呢套野的存在。
一上岸就會見到一個美人魚像。
美人魚像
點解會叫做美人魚呢？佢條尾在哪？我最初以為係好似丹麥的美人魚咁…
沿住海邊的小徑漫步，又黃又紅的樹葉加上海風的吹拂，天下間點會有咁靚的地方？
小徑一旁係海，另一旁係樹林，我地見到樹林有個細陰影移動中，於是我地行入去睇下。
原來有好多松鼠呢～～～
睇完松鼠，繼續行。
南怡島另一個特別之處，佢會在每一個拍攝場地放一張劇照，等Ｄ韓劇迷去體會一下每一個場面。
呢個好似係其中一個場面，606影相影得好高興
南怡島確實係一個幾成功的旅遊點，保留到自然景色之餘又方便到旅客，好多地方都有公廁（乾淨的），而且有個小商圈賣紀念品同食物。
不過呢度始終係韓國，去買野食都係溝通唔到，所以我地只係食最安全的烏冬算數。（烏冬的韓文，都係讀＂烏冬＂）
食飽又繼續行。
南怡島係有小火車俾遊客乘搭，不過我地都係決定步行於這個美麗的環境中。
行行下，又去到另一個拍攝場景。
佢地係乜水？
好有型，銅像都係景點呀！
最好笑係我見到有韓國女人用自己的樣遮住女主角的樣去同個男主角合照，真瘋狂。
行行下，行到島的另一邊。
玩左三個鐘，我地要趕四點十分的火車回首爾，否則錯過左又要等個幾鐘。
再見了
好彩早左離開，我地去到加平火車站係三點四十五分，原來下一班往首爾的火車改了在三點五十二分開出！
溫馨提示：唔好相信書本或網站（OFFICIAL）的時間表，一定要問職員。
南怡島真係一大驚喜，個人認為其秋葉靚過內藏山，因為本人一直覺得最靚的秋葉係要有樹有海，最好係成地落葉加兩旁大樹，呢個景，南怡島俾到我，但內藏山最美中不足的地方係兩旁大樹中間係一段車路。
不過內藏山其實好大，我只可以淺嘗其一二，或者我冇去的其他部份好靚都唔定。
回到首爾，是晚決定食韓燒。
睇香港旅遊書，介紹左一間叫做三層肉.COM的韓燒店，位於惠化站。
去到惠化站，睇住地圖都去唔到，唯有硬著頭皮問路人啦。
千挑萬選揀左個廿幾歲的女仔問佢路，佢真係識英文架，超開心，哈哈…
個女仔都唔識路，不過佢好好人幫我地打電話去問間舖頭的人，之後重帶埋我地去間舖度。
嗚…好感動呀…
多謝妳呀……
去到間舖，又一驚喜。
可能個女仔同左個老闆娘講有兩個中國人去緊佢舖頭，一入去坐低，老闆娘笑笑口咁遞上一個＂中文餐牌＂，又一次超感動呢～
今次叫左個五花腩同千層肉。
就係呢兩件
唔好睇少呢兩塊肉，真係二人份量，食完乜都唔駛再食（不過我地叫多左個炒飯）。
煮完後老闆娘教我地點食，要用生菜包住，加片蘿蔔，加Ｄ泡菜，點下醬就食得。
呢個食法，哈哈…我麻麻地…我都係鍾意原汁原味咁食。
好好味呢～～～
食飽，去東大門買野，哈哈…
買左三件衫，超平，不過冇乜時間慢慢揀，本來想買Ｄ返工衫，但呢Ｄ野急唔來的，有限時間，無謂求其買。
之後去左龍頭站的廿四小時超市買手信。
買完，拎住一袋二袋回酒店pack野了。
沒有留言:
張貼留言