2-10-2011 佛教日

今日冇乜特別節目，只係諗住四圍參觀下寺廟，所以睡到八點幾先起身（其實係被亞媽逼我起床），然後去旅館附近搵野食。

在旅館附近見到一間叫做Sailomjoy的餐廳有唔少外國人食緊野，我地又入去食啦。

sailomjoy

後尾先知lonely planet有介紹呢間野餐廳，而且特別推介佢地的芒果pancake同糯米飯。

我地每人叫左個普通早餐，之後見到個pancake同糯米飯好吸引，又叫左來食。

個芒果pancake真係一流，芒果好甜，而且pancake係連埋芒果一齊煎的！

令我愛上芒果的芒果pancake

食到好滿足，跟住就開始今日的寺廟之旅。

首站係去帕辛寺(Wat Phra Singh)。

話說清邁的的士主要有三種，一種係tuk tuk，另一種就係私家車樣的meter taxi，最後一種係紅色車身，好似一架小型貨櫃車的車種，最少見係meter taxi，其餘兩種都係隨街可見。但係呢類的紅色的士其實我一路唔係好明佢的行走路線，一架車可以上唔同的人，感覺似小巴多於的士，不過既然來到就試下坐啦。

司機收我地每位20Bht，唔駛五分鐘去到Wat Phra Singh。

Wat Phra Singh

經過上次柬埔寨之旅我仍未學精，忘記左背心短裙係入唔到佛廟的，不過幸好呢度有得租借長袍披肩。

先入主寺廟參觀，眼見好多人蓆地而坐聽佛偈，雖然係講泰文，我地都坐低一陣聽下。

僧人唸完佛經後開始食飯，我地繼續參觀。

離開時睇地圖，諗住四圍行去附近的寺廟，但有個的士司機撩我地，話100Bht包三小時車我地去主要佛廟，計過條數都抵，於是我地就上車喇。

首站清曼寺(Wat Chiang Man)，呢個係清邁最舊的佛廟，有千八年壓史。

第二站係松德寺(Wat Suan Dok)，司機話呢個寺廟有好多白色的建築物，入面係放左人骨，所以照片欠奉。

一入寺廟見到有好多當地人聚集，跟住有個僧人行過來同我傾計，佢話十二點半將會有一個佛教的奉獻儀式進行，問准可以入內參觀，我地就慢慢等到十二點半。

松德寺內

奇怪寺廟全部都係泰國人，一個遊客都見唔到，於是再問一個識英文的僧人呢個係乜野儀式，佢話係當地一年一度的祭祀，在生人會替往生人奉獻東西俾僧侶，僧侶會為佢地祈福，所予的錢會用於教育云云。（我大約理解係咁，唔知我有冇理解錯）

一年一度的祭祀前

一年一度的儀式都見到，真係一個好經歷。

睇左一陣就去第三站界遙寺(Wat Jet Yot)，司機話呢個係全泰國唯一一個以印度建築為依據的寺廟，不過睇落唔太特別，所以到此一遊後就走了。

跟住被賣豬仔。

司機車我地去左旅行團必到購物景點，接二連三地睇左gem stone->silk->honey->gem stone->silk，終於走得。

其實我地都買左蜜糖，返到來香港我都有飲架，所以算啦，哈哈哈哈…

賣完豬仔就去最後一個寺廟大佛塔寺(Wat Chedi Luang)，呢個係我今日見到最特別的一個佛廟，佛廟中心有一個好似金字塔的大塔，同其他佛廟的建築好唔同。

大塔寺


大塔寺內的臥佛

而睇lonely planet都有介紹呢個佛寺，寺內會有一個area可以俾遊客同僧侶傾計，不過我亞媽唔識英文，免得佢太悶，我都冇搵到僧侶吹下水。

之後在寺廟附近食泰國菜，然後慢慢行返去guesthouse。

下晝四點，在旅館對面做按摩，正正正！！！！！

按摩完行Sunday Walking Street。

sunday walking street內的畫

我地的旅館在Sunday Walking Street中的其中一條小巷中，一分鐘就到達呢個逢周日先開的市集，呢個露天市集真係超大，我地足足行左四個鐘先勉強來回行得晒！！！

一隻好嘆的狗正在展示佢的眼鏡(我都買左副俾我隻貓)

行到腳跛，在路邊的檔攤幫襯下腳底按摩，其實我真係超怕癢，不過行得咁累就做下乖女陪下亞媽按。

對我來說完全係俾錢買難受，哈哈哈哈…

再掃下街食下野就回旅館休息，準備明早的local tour了。