6點已經去到，成為第一對去食早餐的人，好可怕。
今次真係萬里長征，由胡志明市去Mui Ne要坐四個半鐘頭車，不過好彩佢差不多一個鐘會停一次，可以伸展下筋骨。
我地七點半先開車（之前打的日記就係等車期間打），去到Mui Ne十二點幾，落旅遊巴後要再轉接駁小巴去resort，今次local tour所包的resort叫做Canary，在海邊，由房間行去沙灘都只係兩三分鐘，非常好！
間房有露台架！
settle down後先行出沙灘睇下先。
好似幾靚喎
藍天白雲加大海，完全係我的最愛，但可惜Mui Ne的沙灘並唔係好乾淨，所以都唔太適合落海游水。
個沙灘其實都幾多垃圾
Local tour個guide會兩點來酒店接我地，於是我地在酒店餐廳內食個quick lunch，就出去參加呢個難忘的local tour了。
我地係坐jeep仔代步，同車重有一對德國夫婦，佢地剛由新加坡去完柬埔寨，玩左越北，過兩日先去胡志明市跟住返德國，德國老公話要來Mui Ne學打golf，因為原來在德國，一定要識打golf先可以去打golf，同香港有錢就玩得好唔同呢。
第一站係Fairy Stream，我地要除鞋感覺一下泥沙的感覺，導遊哥哥話呢d叫做腳底按摩喎。
不過開始行stream之前，先參觀魚露廠。
好多魚露
Fairy Stream都幾長，來回咁行都差不多一個鐘，我地一路行一路影相，見到d泥地就跳過去感受下d吸腳的感覺，非常開心。
呢d泥沙好過癮，我見到就跳過去踩架！
導遊話條stream約四百米，但係我覺得起碼有四千米囉！呢個stream我覺得要跟guide行，因為佢會話你知邊度有危險，邊度唔去得，去旅行玩最緊要係安全嘛！
fairy stream旁係樹林同石山
沙分做白色、紅色同黑色，都幾靚架
紅山
好彩有個guide，佢話俾我地知樹林係會有蛇，回程時我地果然見到條水蛇，好彩個guide warn我地咋，嚇鬼死…
之後順道參觀壁虎場，其實我都唔知係壁虎定蜥蝪，但聽聞呢d爬蟲類養大左就會賣俾人食，我估係壁虎呱。
跟住我地上番jeep仔去fishing village。
606 : Hi~~~
一望無際的大海，導遊話d漁民已經出晒海，佢地會朝早才返來，而家只有細漁船泊左岸。
越南有一d小竹籃作為出海的工具之一，導遊問我地玩唔玩，本來都諗住一試，不過漁夫話要USD10一隻籃，太貴了！
而家諗落，好彩咁貴，因為好似都幾危險。
小船回來了
個人非常喜歡以下的一張相，小說有本叫做老人與海，呢張相就係小孩與海。
小朋友望住大海，而呢個大海將會陪伴佢一生
去完漁村，我地搭車去左一個叫做白沙丘的地方，一望無際的沙地，好有沙漠feel。
我估我未來十年都唔會有機會去沙漠，去住呢個先，都唔錯！
白沙丘隔離有個荷花湖架
其實好白痴地，我一直都有點兒驚沙漠，可能細個睇太多關於浮沙的東西，太恐怖了。不過好彩呢個沙丘冇呢d野。
好多腳印
我地幾個重玩左滑沙呢！
就係由呢度滑落去喇
玩到一面都係沙。
臨走前德國太太話影影子相喎。
估下邊個係我？
好白痴呢！
之前又去下一個景點，今次去紅沙丘睇日落。
但好攪笑，去到紅沙丘，個導遊話因為多雲，所以已經日落。
估佢唔到呢！不過我地都影左好幾張相。
個天的顏色好靚呢
路人與沙丘
好多架jeep仔等緊客人
之後返酒店，完成左一日的local tour，我地食完晚飯去沙灘行左一陣，嘩，滿天星，真係好開心呢！
最最最開心係我見到一條好淺色的銀河，咁多星星之下我都搵到個人馬座同夏季大三角，真係令人感動。
呢個睇星的時候，突然好掛住一眾識睇星的莊員。
睇星期間，不停地哼住呢首歌：
浪漫長夜星河 記下了詩人 留住片刻點點愛火
望著其實已不錯 美麗會痛楚 情旋動完美的心窩
不停地為愛禱告 其實上帝聽到並賜你給我
戀情終於得到麼 仍感激接近過…
沒有留言:
張貼留言