23-12-2011 去台灣睇貓

聖誕假期話長唔長，話短唔短，所以決定又去台灣。

其實本來係想去韓國買野，但唔知乜事而家去韓國真係好鬼貴，所以最後都選擇平靚正的台灣。

早機去到台北，今次住在台北車站的橘子福泰館前店，落機後搭飛狗去到台北車站，拖住行李發雞盲搵錯路，好彩遇到兩個好心的台灣男士帶我地去酒店。

台灣真係一個次次都遇到好人的地方。

放低行李，行過台北車站諗住去tourist information center問下有乜地方去，口多多問一下由台北去候硐要幾耐，職員甲話重有十分鐘就有一班車去瑞芳，錯過左要等一個鐘云云，跟住職員乙就帶左我地去買票。

呀？

其實我地冇諗過去候硐，基本上今次係冇plan過在台北要做乜，咁，就無啦啦上左車去瑞芳。

一個多鐘車程，在火車上有個伯伯撩我地傾計，傾傾下竟然交換左e-mail（呀？），我到而家都重收到個伯伯的e-mail呢，台灣人真熱情。

去到瑞芳，我地要等差不多一個鐘先有車去候硐，咁就在瑞芳火車站隔離的＂美食街＂食下野啦。

美食街

食左個鹵肉飯，唔好食。

之後搭小火車去候硐了。

小火車

其實候硐有乜睇呢？候硐本身係一個荒廢左的礦場，後尾唔知點解有好多貓喎，又唔知點解好多人去睇貓，於是就變成一個貓城。

自從養左貓之後我就好鍾意貓，不過今次其實真係冇諗過會去候硐，所以乜都冇帶去。

而且天雨關係遊客極少，成個鐘我只係見到連埋我地得六個人咁多，小貓們冇遊客帶野食俾佢地食，好慘呢。

鐵窗邊緣

有Ｄ貓可能習慣遊客俾食物，佢地一見到我地有膠袋就行埋來喵喵喵喵，唔…遲Ｄ佢地會唔會變成金山郊野公園的猴子呢？

好靚呀

小貓們好可愛，但由於之前在香港太掉以輕心同街貓玩到被佢咬左一啖，所以今次都唔敢隨便摸佢地，免得要打針。

玩左一個鐘，又有火車喇，衝上火車先諗下去菁桐定十分。

因為落雨，所以唔去十分睇瀑布，亦由於那些年的關係，同伴話要行路軌（呀？），所以最後去左菁桐睇火車軌。

去菁硐就係為左呢條火車軌

菁桐好細，好快行晒，連條火車軌都行埋，寫埋枝竹許願環遊世界之後，就坐火車離開了。

我支竹掛左o係呢度

坐個幾鐘火車去松山站，是晚行饒河街夜市。

食食食食食。

在饒河街見到個香港男人，佢話在台灣第一次見香港人，真的嗎？？？我在台北有時會以為自己在香港的…

饒河街最出名係胡椒餅，但我覺得最好食係芝士焗薯蓉，真係超讚哦！！！

在饒河街買左一隻狗仔衫俾我隻貓著，一百蚊新台幣，好抵呀！！！

食飽，行過去五分埔睇衫，但，又因為天雨關係，行左幾分鐘就走了。

搭火車回台北車站酒店ZZZZ。