29-3-2012 時間不停向後行的一日

凌晨機去多哈。

第一次坐卡塔爾航空經多哈轉機去米蘭，飛八小時去到多哈停三小時又再飛，好似冇咁辛苦。

多哈機場

卡塔爾航空又唔錯喎，飛機餐幾好味，多哈去米蘭的空姐好靚。

由於時差的關係，去到米蘭只係下晝兩點幾，好抵哦～

在米蘭住在Del Sole，Lonely planet有介紹，話在中央車站附近比較好的一間旅館，雙人房65EURO一晚，書中描述離火車站400米，但我肯定佢係按地圖比例畫直線！由中央火車站我行左近十五分鐘先到。

米蘭中央車站

 一間乾淨普通的旅館，冇所謂啦，都係睡一晚吧。

放低行李行去中央車站買電話咭，由於我張香港電話咭唔知點解去到意大利冇晒訊號，所以在意大利出左個新電話號碼，二十歐羅連十蚊通話費。（後記：台灣網站教可以問佢地出一張有得上網的咭，咁打返香港更抵，今次我蠢了）

亞叔話打返香港只係幾毫紙歐羅，原來又係呃人，同香港打漫遊返香港差不多，不過打意大利當地係平好多，我地有時要聯絡旅館，所以都有用的。

但張咭activate要差不多十二個鐘囉！唔好信個亞叔話十分鐘攪掂。

在中央火車站食件pizza就開始今日的行程。

搭地鐵去DUOMO站睇下米蘭大教堂啦。

黃昏下的米蘭大教堂都幾靚喎。

米蘭大教堂

 咁夜冇得入教堂內，我地在外面影左一陣相就去附近行下。隔離就係Galleria Vittorio Emanuele II。

在Galleria Vittorio Emanuele II買的第一杯gelato，好貴

跟住返中央火車站，在附近買左個老麥最平的漢堡包同芝士漢堡（５毫同１歐羅咋），就去酒店附近的大型超市買麵包同樽裝水做明天早餐。

是日太累，回酒店即睡。