在guesthouse食完早餐，九點鐘開始活動，今日會去女王宮(Banteay Srei)，呢度距離市中心都好遠，我地個tuk tuk司機係車神，見車過車，但都要用左半個鐘先去到。
女王宮主要係睇佢建築上的雕刻，女王宮主要係紅色，同大部份的吳哥遺址顏色上唔同，好多旅遊書都話佢好靚，導遊在旁講解雕刻的故事，由佢帶住我地行，基本上要睇的都可以睇得晒。
其實女王宮好細，好快行晒，導遊帶我地左穿右插，睇下女王宮附近的景。
不過有Ｄ野真係要留意，女王宮附近其實仍然有未清晒的地雷區，所以要去當地玩的話記住唔好超越圍欄呀。
感冒仍未好番晒，我都係邊行邊休息，在女王宮逗留大約個多小時，我地就去地雷博物館。
呢個博物館係由一位退役軍人自費而建立，門券收益用來幫助受地雷影響的小朋友。
地雷博物館唔大，裡面有超多不同種類的地雷，導遊話地雷的殺傷力可以由炸傷一個人至炸爆成架坦克都有，而家在柬埔寨係有millions of landmines仍然未掃除。
打仗時有士兵會爬上樹上查看敵方行動，所以地雷除左埋在地下，亦會掛在樹上。
睇完各式各樣的地雷，我地坐低睇左一段video，片中講解點樣拆地雷，其中一段印象最深刻係＂製造一個地雷只需三蚊美金，但要拆一個地雷則需要五百蚊美金＂。
過去兩日在暹粒見到的人，無論大人細路都會對住我地微笑，但原來呢個微笑國度裡，仍然有好多人活在一個隨時被炸死的環境中。
行完博物館，導遊問我地有冇興趣睇蔗糖的製作過程。反正來到，去睇下啦。
司機車我地去左路邊的一間小屋旁，有個男人煮緊蔗糖。
導遊順面介紹埋當地人的住屋，佢地好多屋都係用樹葉來蓋頂，聽聞可以擋風雨。在樹葉屋旁有一間好靚的石屋，原來係一座廟，當地人真的好虔誠，在住宅旁會有寺廟，而在吳哥遺址內的佛像，當地居民亦會好好供奉。
在呢個蔗糖小屋中我見到一對好可愛的小兄弟，佢地坐在地下，用樹枝在地上畫畫，然後當我地舉機影相時，小兄弟亦好識得擺pose，有幾次我影弟弟，哥哥即刻衝過來阻住鏡頭，然後笑哈哈咁走過來睇下佢的攝石傑作。
蔗糖主人好熱情咁招呼我地試食，但我買蔗糖都冇用，所以幫佢地買左兩個磁石就離開了。
導遊跟住帶我地去參觀Banteay Samre，當時正值中午，遊人好少，導遊話呢個廟朝早會多人Ｄ。
個人認為Banteay Samre保存得幾好，都唔算爛得好勁。
之後導遊帶我地去左一間…又貴又唔好食的餐廳食飯…
求其食左少少野，我地回guestgouse小睡一會，下晝三點半再出發。
三點半，目的地Ta Prohm，又名Jungle Temple，呢度係盜墓者羅拉的拍攝場地之一，而且成個遺址多處都會見到大樹吞噬建築物的奇景。
我問導遊：電影對呢個遺址有乜影響？
導遊：唯一影響係令到遺址乾淨左。
哈哈哈哈…我諗起某電影在九寨溝拍完之後佈景做成環境污染的一則笑聞。
導遊指俾我地睇樹中的笑臉。
冇佢我地真係行一日都未必見到。
本來想去巴肯山睇日落，但導遊話沙塵大，對我的氣管唔好，建議我地去Pre Rup睇日落。
兩日在柬埔寨睇日落，其實都唔覺得好特別，太陽落在叢林中，都冇太陽落在大海咁吸引。
等待日落期間坐在我隔離的美國人撩我地傾計，佢笑我睇日落睇得太專心，唔留意下四周，在佢半逼半勸之下我拍低左呢張相。
佢一見，大叫perfect。
美國人影左一堆人像（佢影完就會傻笑），太陽都未落山佢就走了。
晚上，我地去old market pub street附近食飯，嘩，好味過lunch十萬倍囉。
食飽飽，行左一陣night market就回guesthouse了。
沒有留言:
張貼留言