2-4-2010 書城戰利品+雜項

定時定候回國內買書。

是次選擇復活節長假期第一日離港北上消費，由於下午三點幾先上到深圳，只可以吃喝購物。先去書城，後去食自助餐。

是次深圳書城戰利品不多，五本書加一隻ＣＤ。

（自上至下，左至右）

［１］寵物世界雜誌，十六蚊人仔，送埋隔離本幼貓養護指南，好抵睇。
［２］南美印加手繪畫冊，係我第一本見到用畫畫形式介紹南美的書，不過佢唔係全畫畫，都有唔少文字同相片。
［３］廿蚊人仔教你餐桌禮儀，幾得意的一本圖畫書。
［４］A Lin真係好正。
［５］一路想買關於貓病的書，之前睇的貓書都係逐個病咁講，但呢一本書係講貓有乜症狀可能係有乜病，顯淺而明，貓奴恩物。

其實重買左一本柬埔寨旅遊書，不過借左俾人睇。

近排我都有在香港買書睇，最近買左呢一本舊書。

<--Neargo子貓絮語


聽聞Neargo在意大利，睇完呢本書令我好想去意大利行一轉，找尋貓之國度。

本來想去深圳搵埋另外兩本Neargo系列，不過搵唔到。

除左買書，今日見到新出的扭蛋。

<--真係好可愛，超想儲齊一套。


至於小公主的近況，近排佢又盲眼仔，於是帶左佢去睇醫生，李醫生幫佢做左個眼仔衣原體測試，好彩係Negative（不過其實呢個測試唔太準）。

<--如果係陽性，佢係有兩條線架，而家得一條線，即是陰性。


呢塊測試結果係診所的VA叫我留來做紀念，不過，影張相算喇，冇咁多地方放呢Ｄ無謂野。