我地又係跟旅遊書教，由台北車站搭台鐵去瑞芳，再轉巴士上九份，不過我估唔到台鐵竟然係企位，我地就咁由台北企足一個鐘。
其實我去過兩次九份，但兩次都係跟團，逗留時間不長，每次都係求其去一間小店食完野行一陣就要集合。
今次去到九份，由街頭食到街尾，爽！
我真係覺得呢個燒魷魚好正
＂魚蛋檔＂
我地真係食左好多野，去到九份我一定要食魯肉飯，話說我第一次去台灣，就在九份食左一碗魯肉飯，自此之後我從未搵過有另一間好食過佢！
某小店外的靚貓
我地慢慢沿住老街上山，去到山頂，大家決定豪少少坐低飲番杯茶。
我叫左一壺花茶，一邊嘆茶一邊享受下九份美景，一樂也。
同父母去旅行，佢地會習慣坐低一陣好快Ｄ走，我勉強強逼佢地一齊在茶居逗留一小時已經好利害。
離開茶居，沿路離開九份，突然發現有條小路指住去昇平戲院。
我知道九份因為悲情城市呢套戲而成為遊客景點，但偏偏昇平戲院呢個場地我係未去過，咁又去行下囉。
昇平戲院我反而冇影到相，但呢條小樓梯都幾得意丫。
去自遊行就有呢個好處，可以慢慢咁行，唔錯。
離開九份已經兩點左右，我地考慮去金瓜石瀑布，但好似山長水遠去睇一個瀑布，唔太適合兩老，所以我地搭巴士去基隆。
事前我並無打算去基隆，一切都係諗住去到先算。
順帶一提，由九份係有巴士直達台北，下次唔駛咁傻搭台鐵上九份了。
去到基隆，先去火車站的旅客服務中心拎地圖，問問職員有乜好介紹先。
職員笑說我地太晏去到基隆，可以行的景點不多，不過佢都推介左條路線俾我地行。
我地先去碧砂漁港睇下有乜海鮮食，不過由於我地冇散紙，唯有搭的士。
去到碧砂漁港，個漁市場唔知因乜事休業一個月，哈哈哈哈…
逗留一陣，離開了。
漁港見到的熟睡小孩
漁港有得放風箏呢
看看地圖，諗住搭巴士去另一個景點八斗子海濱公園，等左一陣都冇車，之後竟然見到剛才接我地的的士喎。
哈哈…
真有緣，咁上車吧。
結果我地就變左包車了。
司機非常好，沿途同我地介紹景點，途中我地見到有架貨車賣生果，爸爸話想食，司機即刻停車俾我地落車買。
司機車我地去到海濱公園就同我地講，呢度好難截車，我在下面等你地啦。
愛死你地喇，台灣人～～～
其實第一次的台灣跟團遊我又係去過基隆，但好明顯我完全零印象。
八斗子海濱公園應該係當地人休閒的地方，沿海，有一大片草地，好舒服呢。
呢度有人玩浮潛架。
返香港睇資料，原來呢度有條小山路可以行下觀下景，可惜我地太晏去到，行唔到了。
之後，搭的士去廟口夜市。
又開始狂食喇。
推介，超好味
上圖的小蛋糕，佢有張牌寫住每人限買幾個咋，但真係好好味呢。
一路行一路食，一路行一路買，嘩哈哈…超開心。
有型小狗
我地求其搵左間路邊檔食海鮮，又蝦又蟹，價錢唔平，不過…
個人認為唔夠鮮。
巴士真係好過台鐵，有位坐，又唔貴。
今日真係好彩，我地在九份同基隆都好好天，但去到士林竟然係落大雨。
在士林，屋企人又買苦瓜汁飲。
乜真係咁好飲？
之後搭捷運去台北車站行地下街，在中山路地下書街又買左三本書。
嘩哈哈哈…
回酒店中途又入左一間台幣三十九塊店（即係香港十蚊店）買野。
喪買，喪食。
台灣真好。
沒有留言:
張貼留言