28-10-2012 中伏了

今早起身執行李，然後出去好清香快餐店食早餐。

食飽返酒店執行李，今日會搬酒店，入住鷺江賓館。

<--海景房

本來諗住住在鼓浪嶼，不過鼓浪嶼住宿可能未必啱我屋企人，所以都係試住廈門最出名的酒店。

check in後休息一陣就準備去南普陀寺食齋，上次自己去廈門係夏天，熱到完全唔想行，今日同屋企人去南普陀寺先發現原來裡面咁大，而且可以行上山的，更利害係今次去竟然唔駛入場費…咁我上次張入場券真係絕版了。

<--南普陀寺

<--南普陀寺內

是次齋宴叫左個四人餐共七道菜，消費180人仔，不過幾好味喎。

<--齋

食飽，行多一陣，買幾盒餡餅，然後行過去廈門大學。

<--芙蓉湖內的黑天鵝

重遊舊地，感覺真係唔同晒。行左一陣廈大就行出去環島路影下相，然後搭車返酒店休息。

<--環島路

之後搭船去鼓浪嶼。

鼓浪嶼任何時間都係咁多人，我地入到去先在小商圈行一陣，在麥當勞附近見到隻假米奇，去旅行心情興奮完全冇諗就同佢影左張相，影完條友除左個老鼠頭指住心口個細到睇唔到的牌話「藝術表演收費２０元」，真係整你個制，不過自己o係意大利高度警惕自己唔好上gladiator當，但在國內竟然咁唔小心失手？

<--你好野

中晒伏。

對鼓浪嶼印象又變差了。

然後繼續逛小商圈，好多出名的店其實在中山路已經有分店，而且，貴左好多。

短短數年，變化咁大，當年飲過的柳橙紅茶唔見左，食過的麻糍細粒左，特式小店商業化左，我愛的鼓浪嶼唔見左。

經過一間慢遞小店，本來想明年生日先寄postcard俾自己，點知原來寄存費要１５蚊。

<--慢遞

回憶果然係美好的。

在鼓浪嶼搵左一間大排檔食海鮮，一般。

跟住離開鼓浪嶼了。

夜晚，出去中山路搵左一間叫31 cafe的咖啡店飲野，冇琴日ｏ個間咁好。

hea 左個半鐘，回酒店欣賞鼓浪嶼夜景。

原來鼓浪嶼的景點１１點半會熄燈的，唔係住在鷺江都唔知道。

ＺＺＺＺ。