26-10-2012 因為平機票, 又去廈門了

屋企人想去旅行，上網搵過最平機票就係去廈門，咁我又去廈門了。

想當年自己一條友拖住行李箱走去鼓浪嶼避世，非常懷念。

早上九點幾機去廈門，到達時間十一點多Ｄ，過關時關員非常有禮，印象良好。

離開機場，搭的士去呢兩日住的酒店，Bestel Hotel。

去到酒店，見到佢有附送手繪地圖，拎張出去睇下先。

首站出去醫肚，先從酒店行去中山路，見乜食乜啦。

行到去一間表妹靚點的餐廳食飯，嘩，香港價呀！不過都食到Ｄ幾創新的點心，例如鵪鶉蛋咖哩燒賣。

<--鵪鶉蛋咖哩燒賣

食飽，睇地圖見到有張曾厝垵的繪圖，聽都未聽過，但既然有手繪地圖咁都應該值得去行下既，再睇下大地圖大約知道位置，就去搭巴士了。

行去渡輪碼頭期間見到有旅行社，未決定聽日去土樓定去金門，就上去問問價錢先。

去金門來回船票三百，去土樓全日團全包只係198，我地最後都係選擇跟團去土樓。

不過在國內報團好得意，名都唔駛俾，交左錢有張收條就攪掂，咁兒戲既？

報完團，搭29號巴士去曾厝垵。

曾厝垵在環島路旁，即係對住個大海，先在海邊影幾張相，跟住過去曾厝垵睇下。

<--環島路

遊客唔多，更好。

曾厝垵係一個悠閒的小社區，有鼓浪嶼的feel，有好多咖啡店同特式小店，我最愛呀！！！

<--特式小店

曾厝垵有唔少民宿都幾抵住，只係呢區自成一角，出去中山路都要廿分鐘車程，不過唔緊要，佢基本上乜都有，重有海鮮食！

<--曾厝垵

行完曾厝垵，先回酒店休息一陣，晚上，出去中山路行街食野，是晚去左一間西餐廳食飯鋸扒，廿幾蚊有鐵板餐，抵！

然後去飲花生湯，下晝經過黃則和花生湯店，當時有個廣州的女仔好激動咁話間野好難食，不過３蚊一碗佢又咁出名，都係叫一碗當甜品啦。

甜，又未至於難食既，都幾多花生。

飲飽食醉，回酒店ＺＺＺ了。