23-12-2012 貓館

睡到自然醒，酒店都冇早餐食了，梳洗後出去西門町的橫巷見到有間食水餃的就走左入去食，皮厚，但好好味。

食完早餐搭捷運去中山站，因為為左去貓館。

<--行去貓館路途見到麵包店的"冰棒"

<--貓館

貓館係一個台北的領養機構，館內有三層，地下係小賣部，有貓用品賣，第二層係書館，有好大的地方休息同睇書，而且係免費的哦～第三層係領養部，要同職員安排先可以參觀的。

在香港經電郵幫朋友訂左隻貓碗，專登去拎。

呢個地方真係一個貓天地，二樓書館有好幾隻貓四圍走，書館的裝修亦係為貓而設，o係入面坐幾耐都冇人會趕我走，真好。

<--你好

<--貓館二樓

幫一堆小貓影相，睇一陣書，好開心哦～休息過後，落樓下買埋隻碗就走了。

然後過對面馬路食牛肉麵（其實我係食左土豆炒牛肉）。

食飽，沿路行去台北車站，好～遠～哦～先返酒店放低隻碗，休息一陣又再出去。

而家去公館站。

在香港已經查了一間專科書店在台大旁有分店，搭捷運去到公館站，一出站旁邊係台灣大學，基於八卦心態行入去台灣大學睇下同香港的大學有乜分別先。

由捷運站出口行入去，應該係台大的宿舍，沿途一片單車海，好恐怖，邊有可能會認得自己架單車架？？？

<--單車海其中一部分

行左一陣台大，影左一陣相，其實冇乜特別，只係想感受下久違了的大學氣氛吧。

跟住去搵專科書店打書釘，好高興買左三本香港未見過的書！

買完書已經天黑，之後行行下去到自來水園區。

冇入場，只在漫無目的地行。

<--公館

之後搵左間cafe坐下睇下今晩可以去邊。

入左去Mr. Poison叫杯野飲下，原來裡面有三隻貓咪，大喜！

<--CAFE內其中一隻小貓

店員抱左隻小黑俾我攬左一陣，哈哈，好開心呢～

今次叫左杯泡泡糖紅茶，真係好泡泡糖…

飲飽，出去行下公館夜市。

食左幾檔小食，跟住坐的士去臨江街夜市。

好好笑，其實平時普通話對答我都自信還可以，但一講臨江街呢三隻字突然語障，連我自己都忍唔住大笑，司機叔叔話下次講通化街夜市就得喇，佢地通常叫通化街的。

到站，其實都好飽，夜市不大，行一陣行完，之前的士司機話可以由呢度行去１０１，不過唔知過去有乜做，所以都係搭的士返西門町。

去到西門町，又發神經去食火窩。

飽死了。