21-6-2013 首次遊高雄

去過台灣幾次，但從未去過高雄，兩個星期前無聊上網見去高雄機票千五連稅，太抵了，即時俾錢造就今次行程。

一路朋友們都話高雄好悶冇野玩，所以都不存厚望，亦都冇睇任何資料就上機了。

早上8:50機，去到高雄10:30，過關拎完行李買張上網電話咭，齋上網３日送１日，我玩４日剛剛好。

<--一入機場捷運就見到你了

由高雄機場可以直接駁到捷運，非常方便，今次我選擇了住在玫瑰森林酒店，裝修幾靚，但唔近捷運，落捷運後拎住行李費事行，搭的士去了。

<--玫瑰森林酒店

由於太早起身，頂唔順先在酒店訓一陣先，然後出去玩。

第一站去橋頭糖廠。

<--糖廠

橋頭糖廠係一間廢置的工廠，有Ｄ小火車同用廢鐵整的藝術品睇下，去到糖廠買包食先，包子店叔叔好熱情咁介紹應該點行糖廠，感謝哦～

不過糖廠都幾多草叢，我餵飽左唔少野蚊，即刻走去最近的便利店買支蚊怕水，順便在附近食個肉燥飯先。

<--火車

睇下火車、糖廠、黑面觀音同埋以前廠長的宿舍－一間日式建築，然後打算返酒店沖涼換衫，今日真係好熱。

<--觀音像

酒店近中央公園站，落車後發現有新崛江同玉竹商圈，好有以前的西門町feel哦。

返酒店沖涼。

黃昏，行去愛河睇下先，由酒店行過去大約１５分鐘，中途在路邊買左個NTD170的水蜜桃，好甜好多汁哦～

愛河，係一條比城門河闊的河，真愛碼頭旁的愛河都真係有Ｄ臭。

<--愛河

<--真愛碼頭

行下行下，行到去鹽埕埔站，搭車去美麗島站，高雄的捷運好多個站都會有自己的特色，單係捷運都會有唔少驚喜。

在美麗島站穹之光頂影相簡直係高雄的指定動作。

<--穹之光頂

去到美麗島，發現六合夜市原來在此站，出去食野啦。

<--六合夜市

六合夜市算大，但奇怪食物種類唔太吸引，後來我地去据扒，一個雞扒一個豬扒都只係NTD130，離晒譜，水蜜桃都貴過佢。

好抵咁食完晚餐就返酒店休息了。