29-12-2015 莫蘭奴冰川之旅

今日要參加mini trek, 所以又要一早起身, 食個簡單早餐, 然後行去旅行社門口等接送。

由於只係在Calafate一整天, 所以我出發前已經預訂咗mini trekking, 去莫蘭奴冰川可以自己開車或者跟團, 跟團有三種, Big Ice會行四小時冰川, mini trekking行個半鐘, 另一個係坐船睇冰川。

搭巴士去緊冰川

我哋8點鐘上車, 去到冰川都差不多10點半, 首站去balcony遠距遠睇冰川同對住冰川食自備午餐, 呢個感覺同之前去尼泊爾對住雪山食早餐一樣咁開心。

睇到大約12點半上返車開始mini trekking, 旅行社之前寫咗好多要求, 我以為要全副武裝咁啦, 連鞋我都專登買過對Gortex, 後來我見到D外國人都只係普通波鞋...

 

 坐船去行冰川

行冰川都幾好玩, 着住冰爪最初係要慢慢適應, 不過適應過後其實都應付到, 導遊話唔駛帶水, 頸渴就隨地裝水飲就可以了, 我都有試飲, 冰川水真係好甜呢!!!

開始上山

初段啲冰都幾黑

好甜的水

行咗個半鐘, 其實都只係行咗最出面的一小段, 行完冰川又有威士忌飲, 哈。

飲酒

行完搭車返酒店, 抖一陣又出去食飯, 今晚去咗一間叫做mi viejo的餐廳食牛扒, 聽聞阿根廷好出名食牛, 我喺呢度都真係食唔少, 今晚呢餐牛煮得唔錯。

食到好飽, 之後又返旅館休息了。