19-12-2015 傳說中的聖誕市集

飛咗十二個鐘, 凌晨五點幾去到法蘭克福, 先喺機場上陣網, 着返多兩件衫, 跟住出去市中心玩。

一落機就見到交通銀行...

第一站買飛已經有問題, 好彩剛巧有個靚仔熱心機師出手相助, 本來我地打算只去聖誕市集, 但靚仔機師話買1 day pass抵D, 咁既然買咗day pass, 就去中央車站行吓。

清晨的中央車站冇乜人, 感覺有點龍蛇混雜, 我地喺車站食個早餐, 等天光就走出站外行下。
 

在法蘭克福的早餐

中央車站

去到Hauptwache站其實都只係九點左右, 市集未開晒, 所以我地行咗去河邊影下相四圍睇下風景。

連教堂都係十點先開門, 不過我地在聖誕市集對面河發現咗一個勁似廟街的市集, 總算有啲野睇下。

廟街式市集

十點零, 返過去聖誕市集行下先, 聽聞法蘭克福的聖誕市集係全德國最大, 我哋喺市集食下腸仔, 飲下蘋果酒(疑似, 因為唔識德文), 行到攰就搵間咖啡廳飲下熱朱古力, 不錯。

聖誕市集

朝早市集冇咁多人, 基本行完一圈, 由於呢度係第一站, 之後重有十幾日行程, 所以見到有野想買都唔敢買。

 飲酒食腸仔

行下食下, 然後去河邊坐下休息下, 我地去法蘭克福轉機的目標只係想去聖誕市集, 所以法蘭克福有乜景點我地完全係唔知道, 喺四圍亂行之下去到Dom--一坐95米高的教堂, 3歐羅上頂樓的入場費, 由於在票務處考慮買票時我聽到「叮」一聲, 飲完酒冇思考能力之下我以為好似米蘭大教堂咁有電梯坐上頂, 於是買票入場, 點知一開門, 樓梯!!!!!

Dom

行咗328級樓梯上到頂樓, 喘晒氣咁睇下個景, 咦? 有啲似布達佩斯喎。

影完相落返去, 喺聖誕市集附近搵咗間餐廳食晚飯, 其實當時五點左右咋...

豬手

食完豬手入市集影個夜景先, 夜晚市集多人咗好多好多, 加上我地諗住早D去到機場所以都冇行咁耐, 行返去地鐵站驚見成個站封站!!!

夜景

天啊, 發生乜事? 四圍問人知道地鐵站爆炸, 冇人知道攪到幾耐, 更可怕係問人除咗地鐵有乜方法去機場, 得出的答案全部都係搭的士, 不過佢地話要起碼50-60歐羅...

好驚呀!!!

好輾轉四圍問路人, 原來只有Hauptwache封站, 我地跑咗去另一個地鐵站諗住搭去機場, 但等極都冇車去機場, 最後我地搭到去中央火車站, 喺出面的的士站截到的士了, 十五分鐘車程差不多三百蚊港紙, 好貴...

好難想像一個城市原來係冇機場巴士呢回事。

雖然旅程好似好黑仔, 不過飛去里約熱內盧呢程機竟然被upgrade咗去premium econ, 嘩哈哈哈... 我有覺訓了!!!