23-12-2015 進入魔鬼咽喉

今日一早起身落酒店樓下食早餐, 然後出發去伊瓜蘇瀑布。

試下mate tea先

伊瓜蘇瀑布位於巴西同阿根廷交界, 喺兩邊欣賞的景觀會好唔同, 有人選擇一日行晒兩邊瀑布, 但我唔想太辛苦, 所以分開兩日去兩個國家睇瀑布。

我地酒店對面馬路就係巴士總站, 先買巴士票往瀑布, 剛巧見到今晚有luna llena活動, luna llena活動係滿月嗰幾日伊瓜蘇瀑布會晚上開放, 喺滿月之下大家可以欣賞瀑布, 今日行完瀑布返嚟先報名。

巴士總站

巴士票100peso來回, 大約坐20分鐘到入口, 入場費260peso。

入場後首先行去小火車站搭火車去魔鬼咽喉, 落火車後行大約10分鐘橋先去到。
 

小火車

 行緊去魔鬼咽喉



魔鬼咽喉(Devil's throat)係近距離睇一段瀑布區, 佢個名源於呢個位置的流水量極大, 發出既聲響就好似魔鬼咆哮咁恐怖, 壯觀程度同我以前睇過的瀑布簡直係天壤之別! 以前睇過既瀑布都只係一條水喉。

喺魔鬼咽喉100%會全身濕晒, 其實我覺得雨褸都冇乜用, 有外國遊客好聰明地着泳衣嚟參觀, 我覺得與其怕濕身反而好好保護相機手機緊要D。

睇完魔鬼咽喉, 搭返火車出去準備行upper trail, 阿根廷伊瓜蘇國家公園主要有兩條步道, 上行由高望瀑布, 下行就由低望, 另外有一條線係坐小船過一個島仔睇, 但今日冇開。

upper trail

阿根廷呢邊全部都要行路, 其實真係幾攰下, 我地行完upper trail就去食野。

國家公園內有好多呢D小動物, 佢地會偷野食的

補充完體力開始行lower trail, 個人認為上行線靚D, 不過我地就在下行線見到雙彩虹。

 只影到單彩虹

 lower trail

行晒兩條trails真係攰到扒街, 返酒店抖抖, 然後拎返D衫加報團join luna llena。

報完團返酒店抖陣, 然後食飯, 今晚去咗間叫color的餐廳食, 不錯。

幾有趣的pasta

之後去到車站準備上車, 但個司機係咁話瀑布已經關門, 問問職員, 原來今晚雷暴所以取消了, 下一日有團係後晚, 但我地已經要走了。

退完錢去食雪糕, 然後返酒店訓覺。