24-12-2015 黑到爆的一日

今朝起身見個天陰陰, 所以晏咗出門口, 食埋早餐九點半先搭車過去巴西伊瓜蘇睇瀑布。

我地喺里約熱內盧去貧民窟時同團遊客話伊瓜蘇日日落雨, 我地喺伊瓜蘇機場時都聽到有接機的人話呢兩日算好好彩有太陽, 不過今日就落雨了。

由阿根廷過巴西伊瓜蘇車票80peso, 但要坐成個鐘, 抵過去阿根廷呢邊。

巴西過境其實幾攪笑, 完全唔需要落車, 連搭巴士都係司機幫你吸印。

去到巴西呢邊落雨, 不過都照入場啦, 入場後佢有巴士車你去到瀑布區, 然後行佢既步道。

園內巴士

巴西呢邊係睇瀑布的全景, 阿根廷就近距離咁睇瀑布。

 

跟住見到有條步道近距離睇瀑布, 着返件雨褸先。

我部相機就喺呢度死咗...

嗚... 真係傷心到喊, 行程頭幾日咋, 之後我重要影企鵝架!!!

好彩張咭冇事加埋部手機未死, 頂住先。行完步道見到有架升降機, 可以去到觀光台由高處睇瀑布。

離開國家公園, 行過去佢隔離既鳥園睇下先。

個雀園都幾大幾多野睇, 而且佢係有免費wifi上網, 於是我一路行一路問香港朋友點樣救返部相機。

睇完雀仔搭返巴士返阿根廷。

返到酒店即刻用風筒吹部相機, 吹咗個半鐘, yeah!!! 救返了!!!

心情好返, 出去食飯。

今日平安夜, 成個伊瓜蘇鎮好似死城咁, 幾間有開的餐廳冇訂位冇得食, 9成店舖關門, 我地好辛苦搵到一間唔駛訂位的餐廳食飯, 超貴, 而且勁難食。

外國人可唔可以唔好整亞洲菜? 好難食!!!

食完又貴又難食的晚飯就返酒店休息了。