22-12-2015 進入阿根廷了

今日早機離開Rio。

六點半喺酒店食早餐, 然後七點搭的士去機場, 去到機場check in, 我網上預訂的坐位「又」被換了, 咁你一早叫我劃位做乜鬼啫?

由Rio去Iguazu要坐左邊的坐位, 即係a,b呢行, 咁會睇到伊瓜蘇瀑布, 可惜我坐右邊。

落機攞行李, 機場竟然會有個bar台有免費野飲, 飲咗一杯不知名的飲品, 然後拎行李。

 巴西伊瓜蘇機場

 不知名飲品

問咗廢廢地的旅客服務中心點樣過境阿根廷, 最後都係要搭的士, 其實搭的士好方便, D司機好熟悉程序, 只係要講價好麻煩, 最後140Rs去到酒店門口。

巴西阿根廷邊境

去到酒店又係未有房啦, 咁我地出去食晏同兌錢, 行咗好耐都見唔到找換店, 去到銀行都冇得換錢, 後來有遊客話我地知巴士總站有錢換, 咁行返去巴士站啦。

 好神秘, 巴士站根本冇找換店, 但巴士站賣票的櫃位有D職員會問你兌幾多錢, 咁就好神秘咁入去換錢, 13美金換100peso, 換咗先啦。

有錢了, 跟住返酒店放低D野, 然後拎D衫出去洗。

一大袋衫80peso, 其實我都唔知佢點計, 不過都唔係貴, 好過自己手洗。

我哋酒店對面就係巴士總站, 巴士站有間話12peso x kg的自助餐, 咁好開心咁衝入去食啦。

點知俾錢時先見到cada 100g(each 100g), 哈哈哈哈...

食到好飽, 返酒店抖陣。

我的行程係plan明天後天兩個整天行瀑布區, 所以今日可以算係冇行程, 呢度天氣好熱, 在酒店游陣水曬下太陽先。

然後出去行下伊瓜蘇市。

成個鎮好細, 一個鐘實行得晒, 我地睇地圖見到有條河喎, 咁問下人點去啦, 西班牙文有用了, 嘩哈哈哈....

不過行去河的沿路真係好靜, 淆淆地之下見到河水就即刻走了。

 沿路貓都冇隻...

然後去咗一間叫做aqva的餐廳食晚飯, 後來先知原來呢間餐廳要訂位的, 我地walk in有得食算好彩了。

好好味呢~~~

用餐期間見到出面有個女人同亞婆帶住幾個細路, 有餐廳的人用餐後拎咗D野食俾佢地, 期間有食物跌咗落地但小朋友要執返上嚟食, 睇到唔忍心, 於是偷運咗個麵包俾個小朋友食, 雖然同伴警告可能會引到佢地跟住我地返酒店或者會偷野搶野, 我地係來自一個以欺詐聞名的國家, 佢的擔心我可以了解, 不過, 細路啫點忍心猜度佢咁多呀? 呢度又唔係某國...

無驚無險佢地冇跟住我地, 無穿無爛咁返到酒店休息了。