去樓下搵職員問佢有冇下晝團可以去啦, 佢地話冇, 我死唔信邪, 出發前我身邊唯一一個去過里約熱內盧的朋友介紹咗一間local tour俾我, 打電話去問, 下晝有團, yeah!!!
因為報咗團下晝去貧民窟的關係, 我擔心趕唔切返酒店, 所以今朝搭的士去耶穌山。
去到耶穌山小火車站, 職員話下一班車要9:20分, 睇手錶, 8點咋喎, 點等呀? 但火車站個鐘指住9點, 咁我問職員係咪要等一個鐘, 佢話係喎, 於是我地轉搭小巴上山。
其實成件事好詭異, 小火車公司同小巴公司係兩間公司啦, 問火車站職員佢地又唔知小巴站喺邊, 我地離開火車站就見到有疑似小巴公司員工招攬客人, 咁剛巧見到一班女仔搭小巴, 於是跟埋佢地一齊上車。
首先小巴車我地去售票處, 呢度係賣小巴票的, 來回票價25巴西紙。
喺呢度有個金髮男人問我地識唔識講英文, 我諗佢應該好desperate, 哈哈... I know your feeling bro! 佢問火車站喺邊, 我地話佢知方向, 但加多句, 要等一個鐘喎, 咁佢就搭咗小巴喇。
上小巴會停兩站, 第一站係一個不知名山頭, 遠眺耶穌像, 司機話D人會喺呢度等霧散先上山。
咁我地見開始睇到耶穌像就跳返上車啦, 然後第二站就係買票入場, 盛惠37蚊, 之後要搭official小巴接駁上耶穌山, 好曲折的路程呀!
終於上到耶穌山, 好大霧呢!!! 除咗偶然睇到耶穌像個頭, 基本上乜都睇唔到, 更遑論睇到足球小將經典的糖包山景像啦...
影咗D相, 跟住去買下紀念品先, 買完突然霧散晒, 我影到藍天的耶穌像喇~~~
不過呢個藍天只係維持咗一陣, 跟住又大霧返。
落山。
落山時諗諗下開始懷疑自己隻錶既時間係錯既, 搭的士返酒店時更加確認原來真係慢咗成個鐘, 哈哈... 我之前老點咗個desperate男呀! 哈哈...
返到酒店去附近行一陣, 原來都幾多紀念品店架喎, 然後去咗一間餐廳食漢堡包。
食飽, 行一陣紀念品店, 然後返酒店等去貧民窟。
2點鐘上車, 里約熱內盧的貧民窟非常多, 而佢地坐落喺山上, 喺香港呢D景完全係豪宅區, 不過貧民窟係所有旅遊書都講明叫你千祈一定切記唔好自由行入去, 貧民窟經過多年整頓其實環境已經比以前好, 但入面仍然有唔少毒販, 冇當地人帶住你唔會知道邊個係毒販, 導遊講明千萬唔好影人, 而跟團參觀的話, 導遊帶你去的地方基本上安全到不得了, 但膽小的我係連電話都鎖咗喺酒店夾萬, 結果影唔到好多靚相。
貧民窟內其實可以話係一個自給自足的小鎮, 巴西政府積極整頓之下貧民窟已經有部份人要交稅了, 而在數年前亦開始有連鎖店進駐區內, 不過區內仍然保留一D不合法的活動, 例如電單車的士。
整個團帶我地去咗兩個貧民窟加一所區內的學校, 三個鐘, 都幾值得參加。
位於貧民窟內一所由意大利人創辦的學校
去完貧民窟返酒店整理儀容, 跟住出去買野食野, 今晚食巴西燒, 嘩哈哈哈... 好飽。
之後返酒店休息了。
沒有留言:
張貼留言