14-9-2017 首次踏足澳洲

昨晚11點幾機去悉尼，8個幾鐘機程，比想像中易過，不過我對腳伸唔直都係瞓得好差。

過關其實都幾嚴謹，登機前都要搜行李。

去到悉尼先喺metro買張opal card，增值咗60澳，跟住搭地鐵去Mynyard Station，我哋今次住Grace Hotel，位置唔錯。

悉尼既地鐵有三層，都幾有趣 。

去到酒店先梳洗一吓，跟住我哋去咗Nandos食飯，兼且捉到袋獸，哈哈⋯⋯

食飽我哋行去悉尼大橋，其實我去悉尼之前係完全冇睇過旅遊書或任何資料，所以我根本唔知歌劇院原來就喺大橋對面，哈哈⋯⋯乜都唔睇果然有D驚喜呀！

 

行去大橋的沿途

 

大鄉里出城好開心係咁影相啦。

影夠喇，諗住去隔離個Contemporary Art Museum行吓，不過中途見到個波波池，而且職員好歡迎成人入去玩喎。

好開心呀！好耐冇玩過波波池！而且呢個波波池都好深架，香港嗰D最多去到腳眼，呢個去到小腿架！

跟住我哋入去呢個Contemporary Art Museum睇，藝術既野我真係識條毛，佢D展品的解釋，每一個英文字我都識，但加埋完全唔知佢講乜。

不過呢個Museum的roof top restaurant係值得去吓，個景好靚。

跟住我哋行返酒店，沿途去咗超市買少少野，返到酒店休息一陣就去咗酒店樓下間Vapiano食野，D意粉都整得幾好味喎。

食飽，好快咁搭咗地鐵去Circular Quay，行去睇Opera House同Sydney Harbour Bridge的夜景。

睇完行返酒店瞓覺。