24-12-2017 首遊緬甸

12月23日晚10點幾機出發，緬甸比香港慢個半鐘，我哋到達仰光已經係當地時凌晨12點幾。

我哋今次包晒車，所以一出機場司機已經等緊我哋，但係緬甸機場最恐怖係你一出嚟就有一班人衝嚟幫你搬行李然後問你攞貼士。

返到酒店都凌1晨點幾，不過成晚瞓得好差，因為酒店出面成晚都有狗吠。

 

Esperado lake view hotel

第二朝8點未到就起身，稍作梳洗就上酒店9樓食早餐 。

 

食早餐時的view

食咗早餐就開始今朝既行程，第一站去仰光最出名既大金寺，其實我哋酒店房間都望到大金寺個塔，不過塞車比較利害，我哋去到10點幾，行咗成兩個鐘先勉強行完。

仰光既第一個印象係睇唔明D指示，司機放低我哋喺大金寺，我哋都唔知邊度係入口，哈哈⋯⋯行來行去結果由東門搭lift上去。

以前去佛寺都知道要除鞋，但我冇諗過緬甸既佛寺係喺外圍已經要開始除鞋行石路，平時旅行都會帶拖鞋，但因為試過有D寺廟着拖鞋唔入得所以今次專登唔帶拖鞋就出事。

我哋由東北西南咁行一圈，最可惜係主座大塔唔可以入去參觀，大金塔話最頂係鑽石，其實我乜都睇唔到。

咁行完大金寺就去食晏，去咗朋友介紹的Padonmar食緬甸茶，都算好味，食飽我哋要等司機整完車嚟接我哋，跟住就去中央車站。

中央車站真係好原始的緬甸感覺，我哋行程並無坐火車，我諗而家既我都未必夠膽坐呢D。

之後上返車去Mahabandula Garden，我哋冇入附近既Sule Pagoda，只係離遠咁影咗張相， 跟住上車去咗Strand Hotel食high tea。

 

sule pagoda

服務一流，食物唔錯，呢邊使費嚟計係好貴，但如果以香港價錢嚟講係超值。我哋四個人叫咗兩個tea set，職員會識叫你唔駛每人一壺茶，唔錯唔錯。

食飽都6點幾，我哋搭車去St. Mary's Cathedral，今晚呢度附近有有表演慶祝聖誕，同時亦有修女喺度派飯，我心中默想，施捨其實先係聖誕真正意思。

行咗個零鐘，我哋搭車去酒吧街食飯。呢餐係中菜。

期間有D人行乞，習慣咗香港或大陸對待乞丐的模式，我表現到好心硬，但觀察過後開始後悔，其實即使被騙，又會被騙幾多錢呢？

食飽返酒店休息，咁就第一日。