14-11-2016 京都市內遊

一早睇咗天氣預報，知道今日京都會落雨，所以今日冇去郊遊，只係留在市中心玩 。

因為之前幫亞哥買咗隻starbucks杯，附送咗張咖啡券，所以今早去starbucks食早餐，點知去到之後佢話要帶埋隻杯先可以用呢張券喎，既然係咁，就無啦啦用多1950円買多隻聖誕版杯嚟用喇。

食完早餐，準備搭巴士去祇園，不過去祇園前我地先去八板神社，呢度個庭院都有紅葉睇，而更驚喜係睇睇下紅葉見到有四隻貓喎，哈哈⋯⋯

去完八板神社就走咗去隔離的知恩院，我地見到有free shuttle就搭啦，一上車時我都發覺個司機勁驚訝，原來搭車2分鐘就到，呢架車應該係俾D老人家搭，不過我地虧既，搭車都應該冇乜問題。

哈哈⋯⋯

知恩院冇乜特別，其實喺我眼中，京都好多寺廟都一樣，而且好多都係冇得入內參觀，如果單純睇外觀，其實冇乜太大分別。

去完知恩院，行去祇園商店街，跟住行去花見小路。

去到花見小路有D失望，因為竟然見到國際名店，我以為呢度主要係小店為主。

行到花見小路盡頭既建仁寺，入場費太貴，放棄。

行完建仁寺個門口，我地經過鴨川行去河原町，然後去到新京極商店街行一陣，之後轉入錦市場。

錦市場有D似黑門市場，但冇咁多海鮮，不過我地都食咗隻大生蠔同拖羅。

喺錦市場行咗一個圈，食埋碗烏冬就走了。

跟住行咗去錦天滿宮。

參觀完錦天滿宮就去咗睇貓頭鷹。

雖然貓頭鷹好可愛，但間野真係有D唔人道，佢地的活動空間真係太小，所以其實最好就唔好去喇。

睇完貓頭鷹，行吓條新京極商店街，行完準備離開時竟然見到間LOFT！

最初去LOFT係諗住買文具啦，唔係買咗好多，跟住八卦行上一層竟然俾我見到富士山杯！天啊！！！我諗咗好耐，隻杯連稅要5400円，真係好貴，不過堅靚！

今日竟然買咗兩隻杯，不過兩隻我都好鍾意，返到香港都成日用。

去完LOFT，搭巴士返京都駅返酒店放低D野，然後去咗行AEON MALL。

呢間超市冇乜生果賣，好可惜，之後我地行咗去AEON PET買野，好多野都好靚，不過真係拎唔到咁多返香港。

行完之後上咗去四樓food court，食咗個牛肉飯同大阪燒。

大阪燒真係好足料，超多豬肉，重加多隻雞蛋。

飽到癲，行返酒店休息了。