攪掂晒放低行李後就搭地鐵去梵魚寺, 搭地鐵期間有個伯伯主動同我地傾計, 呢個伯伯有70歲, 講英文非常流利, 意想不到!!!
伯伯拉住一車空膠樽話佢要去梵魚寺裝水俾D病人飲, 既然順路佢就帶埋我地搭巴士(90號)去梵魚寺。
伯伯非常熱情, 最難忘係佢知我地來自香港, 就叫我地唔好放棄爭取民主, 其實我真係好感動, 亦好感概, 無錯, 民主唔係你坐喺度就有, 亦唔係話因為冇結果所以唔爭取, 我明白的, 最感慨係途中有另一批香港遊客, 伯伯都係咁同佢地講, 而其中一個回覆係... 唔關佢事...
唉...
伯伯帶我地去到梵魚寺, 再同我地講每日12-1有免費飯食, 我地就分開了, 謝謝你伯伯~~~
拖住車仔的伯伯帶我地去梵魚寺
去到梵魚寺, 發現只係剛開始有紅葉, 寺廟配紅葉的景欠逢, 不過都值得睇下D廟既。
梵魚寺
少少紅葉
睇完廟影完相飲埋山水, 又撞返伯伯, 佢叫我地快D去食飯, 食完可以再上一段小路睇大佛像, 好啦, 我地入去食齋先~
有白飯有湯同好多泡菜, 其實我對泡菜的喜愛度絕不高, 所以食咗少少就走了... 順帶一提, 呢度所有野都係自助, 包括洗碗。
行一段小斜路就見到一個戶外的佛像。
戶外佛像
參觀完梵魚寺, 搭巴士落山。
落山後見到有間傳統韓食店, 入去食咗個石頭窩飯同餃子, 好味道~~~ 老闆娘請埋我地食柑, 好甜呢~~~ 佢重問我地飲唔今咖啡, 哈哈.... 你地好可愛~~~
跟住搭地鐵去動物園喇...
釜山的動物園係新開的, 叫做Samjung Park, 唔係Samsung呀! 我地搭地鐵去到西面站落車, 然後睇下邊個出口有63號巴士就出去, 上到地面, 唔知行邊個方向, 於是問路人啦, 點知後生仔好驚咁話I don't know就走咗, 但突然有個亞叔過嚟話帶路!
佢真係帶路的!!! 佢帶我地去巴士搭埋巴士行到去售票處呀!!! 感謝你~~~
釜山人的熱情真係令我好感動~~~~
動物園不大, 入場費19000won, 我地4點前去到, 今晚收9點, 所以都有大把時間玩~~~
一入到去就睇到門口有個牌話4:30有個牧羊人放牧show睇, 咁衝去綿羊區啦~~~
有個職員帶一隻牧羊犬入羊欄度, 然後班羊跑下跑下... 咁... 就睇完喇, 哈哈..... 太有趣了!!!
呢一區重有牧羊狗, 雞, 兔仔, 豬仔, 爬蟲同雀仔睇。
然後去另一個區域。
由於我真係好鍾意去動物園, 去旅行如果該城市有動物園我基本上都會去, 呢個動物園最特別之處係佢個黑熊區域前有個洗手間, 入面係有玻璃窗對住熊園, 我洗手時剛巧見到有隻黑熊行過, 聽聞男廁尿兜位置都有玻璃窗, 哈哈....
黑熊區廁所
另一個特別之處係有職員帶D山羊同豬仔行街, 俾遊客近距離接觸(帶動物離開籠唔係第一次見, 胡志明個動物園我見過職員帶大笨象行街)...
剛巧動物園有隻BB老虎出世, 所以大家可以睇下呢隻老處BB, 好可愛呢~~~
BB老虎~~~
而呢個動物園最詭異的地方係竟然有個area係放咗幾隻狗仔!!!!! 哈哈... 我以為北韓先會咁!!!
去完動物園, 搭巴士返西面地鐵站附近搵野食, 最後都係食炸雞, 呵呵...
食飽, 搭地鐵返酒店休息了~~~
沒有留言:
張貼留言