清邁之旅前記

又去清邁...

其實早於約半年前無聊之下睇下機票, 聖誕節去曼谷機票只係二千頭, 所以即刻買咗...

點知而家曼谷政局不穩, 所以唯有轉飛清邁。

剛剛攪掂所有機票同酒店, 有點兒out of budget... :(

英國感想

當年選擇去英國只係因為去希臘冇直航機，在數個可選擇的轉機點中我揀左去英國，原因係為左去大英博物館睇埋希臘被搶的古蹟。

對英國的感想。

1. 冇期望之下原來係有驚喜，英國冇我想像中咁悶。

2. 千祈唔好安排一日去晒所有博物館，即使大英博物館好精彩，一日睇三個博物館仍然會令我吃不消。

3. Cambridge係英國之旅中我最愛的一個地方，該地寧靜純樸令我心境非常平靜。

4. 福爾摩斯博物館好好睇。

5. Harrods大減價真係好抵。

6. 英國物價好貴，我第一餐在Natural History Museum外食左一隻香港宜家傢俬質素的熱狗，盛惠3磅半，自此之後我差不多每一餐都在瑪莎搵最平的三文治解決。

7. 在英國借宿朋友的朋友的朋友家，非常感謝對方借宿俾我地兩個，不過其實去旅行借人地屋企住都幾唔方便，所以應該冇下次了。

8. 唔知點解咁黑仔，在希臘同英國都遇到痴線的人。

英國有好多熊仔

希臘感想

希臘一直在我旅行list中排第一，畢業後儲左一年錢即刻背背囊去玩，呢次自遊行令我嚴重中左旅行毒，愛上漫無目的唔望地圖咁行來行去。

對希臘的感想同印象…

1. 希臘的神話同歷史好吸引，能夠踏足此地睇到當地的建築同雕像實在係一個非常寶貴的經歷。

2. 希臘物價在歐洲中算係比較低，在小島其實消費並唔係好貴，三十歐羅已經有一間好整潔的小白屋俾你住。（咁當然唔會有海景啦）

3. 希臘人係一個長相漂亮的民族，不論男女，質素都非常高。記得第一日在雅典行central market，我同同伴都驚訝點解斬豬肉的都咁靚仔。

4. 希臘人亦係一個鍾意呃人的民族，我地搵住宿、購物時都不知被騙幾多千萬次。

5. 通常去完小島都會返雅典然後搭飛機離開，但記住要預留多一兩日時間，因為船期隨時在毫無先兆下取消。

6. 去到希臘最常食的就係Gyros同moussaka，我愛moussaka愛到返香港都要上網學整來食。

7. 去到希臘的小島根本唔需要任何攝影技巧或者好高級的攝影工具都可以輕易影到靚相，不過…五年後睇番當年影的相我係萬分後悔…

8. 在Oia看日落至今仍然難忘。

 I miss you kitty~~~

10/7/2006 再見, 倫敦

最後一日在英國，同時亦係是次旅行的最後一日了。

昨日血併日已經買齊手信，今日冇乜特別地方想去，所以決定遊覽一下英國倫敦的名勝。

去到英國，點可以唔睇下大笨鐘？正如去雅典，又豈能唔去衛城呢？

所以今日第一站就係Westminster station，看看River Thames旁的各個地標。

一出underground station，大笨鐘便在眼前，而泰悟士河對岸就係London Eye。

大笨鐘

London Eye

因為對倫敦唔係有特別大興趣，我決定今日要用最少時間去最多景點，所以在大笨鐘影左幾張＂到此一遊＂的照片就離開了。

看看四周的指示牌，向西敏寺出發！

早上十點，去到西敏寺門口見到門外已經大排長龍，看看收費，嘩！不知是六磅還是十磅…昨日瘋狂購物，我只餘下三十英磅，為免之後超支返唔到香港，所以又一次在門外影張＂到此一遊＂。

西敏寺

之後，再看路牌打算去Buckingham Palace，佢同西敏寺相差兩至三個underground stations，不過見有大把時間，慢慢行過去吧 。

去到Buckingham Palace見到有好多人，拿旅遊書出來看，原來十一點有換班儀式，而家距離十一點只有二十分鐘，大好機會搵個靚位睇下先！

特別鳴謝三個高大的English speaker（已分不清係當地人還是遊客）讓出最前的位置俾矮小的我，我坐在馬路旁，等待一隊紅衣黑帽的士兵過來…

白金漢宮

哈哈…原來英國的士兵換班係幾好睇的，有騎兵，有銀樂隊，非常有氣勢有氣氛！

呢套制服好靚

當士兵經過我面前的小馬路就會轉入白金漢宮，但由於人太多，根本無辦法擠上前看，所以我又改去其他景點喇。

決定先沿剛才過來的路返回大笨鐘，再沿泰悟士河行下。期間，我又一次迷路了。不過因為呢個小意外，令我行到去一個名叫Westminster Catholic Church的教堂。

離開，無意中發現了一個小市集，去旅行我比較鍾意行街邊檔，之前去Portobello Market睇唔到，今日補番數。小市集位於Strutton Ground，一條小巷，其他人可能會覺得沒大特色，不過我行得好開心。

在裡面發現了兩間小型書店，還有一些賣舊書的路邊攤、生果檔等等。

生果檔

終於回到River Thames旁的大笨鐘，時間尚早，就沿泰悟士河走走吧！最初打算乘坐遊船遊覽泰悟士河，不過都係慳住使好D。

邊走邊看，泰悟士河旁有一些賣藝的人，亦有一些二手書檔攤。

行行下突然諗起小時候常常唱的London Bridge is falling down…好！就去睇下London Bridge是否咁容易falling down！

在London Eye附近遇到個警察，問問對方London Bridge的位置，警察好驚訝地說＂it's 2 miles away from here＂，對＂miles＂呢個單位毫無概念的我，覺得大概應該是步行路程吧，所以繼續行！

行下行下，已經見唔到London Eye了，但…點解重未見到一條叫做London Bridge的東西？

搭underground吧，反正買左1 day pass。

去到London Bridge站，出閘後完全搵唔到泰悟士河的方向，問下人啦，美麗的金髮女子帶我去睇地鐵的地圖。嘩，多謝晒呀！

搵河時無意中見到London Dungeon，雖然旅遊書有介紹，但其實我唔知道佢係乜，可能係鬼屋吧。

肚餓了，在London Dungeon旁見到一間快餐店，食左個英國必食的fish & chips。

吃飽飽第六靈感可能會豐富了，所以一離開食店亂行下竟然去到London Bridge，唔…原來London Bridge只係一條普通的行車天橋，而我心目中的＂London Bridge＂，正確名稱應該係＂Tower bridge＂（我看到Tower Bridge時仍未知佢個名，詳情下述），果真係讀萬卷書不如行萬里路！

冇乜特別的London Bridge

離開London Bridge，見到有個指示牌指住Monument及Tower of London，乜來架？斷估係倫敦必行景點呱？之前冇細閱倫敦旅遊指南，對倫敦景點接近零印象的我，開始有點後悔。

原來monument係一條唔知紀念乜野的柱。

跟住跟指示牌行去Tower of London，其實沿路一直都好少人，但一轉入Tower of London，嘩，做乜咁多人架？

原來Tower of London係一個古堡，因為又要入場費的關係，我又一次到此一遊。在London Tower外搵個好位置，影左幾張Tower Bridge（這時我才知這道我印象中＂London Bridge＂的真正名字）的照片，看看手錶，要離開了。

呢個叫做Tower Bridge呀

返去Earl's Court收拾細軟，搭地鐵去Heathrow，半個月的歐洲之旅，就此結束。

9/7/2006 Harrods血拼之日

不經不覺，我的旅行已經接近尾聲，今日係最後兩日，開始有點兒患得患失的感覺。

由於同伴有朋友在英國，於是今日我又單獨行動。

其實偶然一個人去旅行都幾寫意。

不過是日出師不利，一上undergroud便搭錯車！！！原本今早的第一站是Notting Hill中的Portobello Market ，跟Earl's Court只是數站之隔，可是搭錯車的我，要轉幾次車才到達Notting Hill Gate那一條線。

倫敦的地鐵係非常討厭的！走上走落先可以轉車，好多時都冇扶手電梯要行樓梯，累死了…

幾經轉折終於去到最後兩個車站，不過…

月台廣播竟然話前路要暫停服務，所有乘客必須落車！！！

天呀！！！我已經搭了近四十五分鐘的車程（包括走上走落轉車），我打死都唔會搭回頭車，於是硬著頭皮，走上路面改搭"雙層巴士"了。

英國的雙層巴士要在站前買票，地鐵停駛我係要俾多1.5磅搭巴士！

由於唔知道應該邊個車站落車，於是不停問四周的乘客。幸好有驚無險地終於落了車。特此鳴謝一個熱心助人的黑人乘客，落車後亦指示我要走的方向，所以請大家唔好歧視黑人。
（因為我遇見討厭的，全是白人）

去portobello market的路程簡直係波折重重，問了多個途人後終於去到。

Portobello Market

唔知道係我太過早到（早上十一點），定係星期日休息的關係，我完全見唔到什麼跳蚤市場般的路邊攤，一心打算在這裡的路邊攤買便宜麵包的我唯有離開。

乜都冇得睇

下一站準備參觀Sherlock Holmes Museum。

一出Baker street underground station，一大個Sherlock Holmes的雕像就在面前！可惜得我一個人，所以冇同呢個雕像合照。

福爾摩斯銅像

一直靠問路的情況之下竟然好快就去到Sherlock Holmes Museum了。博物館在Baker Street 221b，跟小說的情節一樣。

 Baker Street 221b

博物館主要按福爾摩斯小說所描繪，將221b室裝飾成跟小說一樣，博物館有四層高，入場費六磅。

福爾摩斯間房都幾靚喎

二樓是Dr. Watson與Sherlock Holmes經常討論案情的客廳，入面有一個白髮老伯伯在裡面，伯伯自稱是Dr. Watson，已經一百三十多歲。

由於我只看了幾本Sherlock Holmes的小說，所以其實唔係好清楚細節。

四樓有多個蠟像，應該與Sherlock Holmes的案件有關吧？

係邊part呢?

離開後行左去了對面的On Sale紀念品小店看東西， 買了一本福爾摩斯全集，真的是全集啊！！！所有故事，細chapter也有，可是字體亦非常細，十磅價錢簡直係抵到爛！！！（註：我到2011年仍未睇晒）

之後搭underground往Knightsbridge的名店Harrods買餘下的手信。寄住的屋主話近日Harrods大減價，原來大減價的東西，真係非常抵！！！

本來只是打算買幾個Harrods袋及鎖匙扣回港，但在大減價的時候各歐洲貨比真的非常便宜，連我都忍唔到手係咁買！難怪在英國會遇到咁多香港人。

Harrods

貨品平的程度…Anna Sui的香水在香港賣四百多元，但在Harrods大減價時，竟然只賣十磅半，兼夾付送一支body lotion及一個袋！！！由於香水入境有限制，我亦不敢多買。

買到開始拎唔到，唯有回家吧。但回家前，先去麥當當食個午餐＋下午茶～

食飽，回家開始pack東西了，幸好在希臘買了一個gip，大派用場！

收拾完畢，要看世界盃決賽了！！！意大利對法國，驚險萬分（很怕迪比亞路再次發波瘟），我要為我在香港投注那十元打氣！！！

最後，多謝查斯古特的中楣，意大利捧盃了！！！嘩哈哈…十元變一百，第一次賭波就贏左喇，嘩哈哈哈…

如報復般的一個世界盃，在我的歡呼聲下結束，而我，明天便要回香港了。

8/7/2006 再別康橋

今日要去劍橋呢！

今早遲了出門口，去到King's Cross station，再排隊買火車票時，已經是10:43a.m.，但下一班離開的列車，是10:45a.m.呢。

離開cambridge時才有時間影的king's cross station

好險…

去到Cambridge station大約11:30a.m.，落車後發現原來要去劍橋大學係要轉巴士的！哈哈…習慣了中大一踏出火車站便到校園，便以為天下間的大學都係咁，哈哈…

第一站去tourist information center，一來看看有沒有免費地圖，二來係買紀念品。

我家老兄一早要求我要幫他買一件cambridge tee，怕迷路，又怕離開時已關門，所以一開始便買了三件衫四圍走。

接著去出名的King's College Chapel，入場費要4磅半，不過依然排長龍。對我來說入場費太貴了，我在門外拍張照就走了。

King's College

同同行者想去的地方完全不同，大家又一次分開行了。（其實咁樣去旅行係最好，完全冇壓力）

Trinity Hall

經過Trinity College，假扮學生買學生票，行左一個圈。本來想去Bridge of Sigh，但原來佢不在Trinity College，是在隔離的St. John's College！

Trinity College

入到St. John's College，沿著它的旅客路線圖，終於去到Bridge of Sigh了。這條橋的命名，是因為學生要考試，便要經過這條橋，每個學生，都會在這條橋嘆氣。

Bridge of Sigh

呢條橋是禁止進入，只可以在對面的橋遠觀，不過…呢個世界總係有唔守規則的人，當我亂走的時候，發現有遊客靜靜進入Bridge of Sigh，我梗係跟啦！

Bridge of Sigh內觀

離開St. John College，準備去玩punting喇！

沿著小河，一路都看見很多punts，但究竟邊度上船呢？

好多人呢

四圍走四圍走…有一個Queen's College畢業的女生在招攬玩punting 的遊客，哈哈…實在太幸運了！

跟著佢，終於去到punting的上船點。

你可以選擇自己划船或者由船夫代勞，我梗係坐下算啦！

上船後船夫便一邊撐船，一邊介紹景色。

可惜我的英文唔太好，有Ｄ介紹都唔清楚。以下是我聽得到的介紹。
Bridge of Sigh－如上。
Kitchen Bridge－連著廚房而命名。
St. John College－校園內有一座建築頂部有隻鷹，頭部向著大門。
Claire Bridge－Claire College的橋。
Claire College－聽不清是法國貴族還是公主的名字。
King's College Chapel－建築沒有橫樑直柱支撐。
Main Library－有齊全英國出版的所有書籍，而且最少有一本。
King's College－所有學生畢業都會跳橋慶祝，但King's College 的水太淺，所以學生都不跳橋。
大約如此。

我在船中影其他船

一小時的航程，很滿足，非常值得！誠意推介！

Cambridge的環境非常舒適，坐在河畔，非常寫意，真的希望可以有時間坐在河邊看看書休息一下呢！

還未到約定的時間，繼續四處閒逛。Cambridge的物價比London低，所以都買了不少手信。
閒逛間見到一個Art & Craft market，有很多藝術品，不錯！看見有Cambridge的畫，可是要16磅，太貴了！於是只是用3磅買了一張相，及以1磅買了三張postcard便離去了。

慶幸沒有衝動買下圖畫！之後去到Cambridge的類似flea market的地方，看到差不多的畫，10磅三張！！！（數年後我去深圳大芬村，發覺世界各地好多畫都係由佢地出品，從此改寫左我旅行買畫的習慣）

午餐＋下午茶是marks & spencers的三文治（最抵），之後再四處走，期間看到不少小型舊書店，非常歡喜！可是只可以稍為一看便要離開。

5:15p.m.，要離開Cambridge了，我對Cambridge的印象不錯，情願多留幾天在Cambridge都比留在London好！

 bye

回到King's Cross，坐underground去Leicester Square準備購買Les Miserables的門票，可惜，Les Miserables只餘下貴門票，我們唯有改看Chicago。

Chicago

後悔莫及！！！

位置不太好，前面的人太高，我要不停移動身體才看到舞台，但後面的鬼佬又話我郁來郁去佢睇唔清楚，劇院內的ventilation很差，整場show鼻塞得要命！

晚上跟屋主的女友吹水，先知道那場musical故事背景是監獄…真的…我睇左成場都唔知道呢！！！（近年看了電影chicago，再諗番先知當年我睇緊Ｄ乜）

下次都係要睇Ｄ知道個故事講乜的musical比較好。

7/7/2006 大英賊竇館

今日完全係博物館日，是日行程安排左行三個博物館，第一站是Natural History Museum。
去到Kensington station，沿著指示牌一直走，很容易便去到了。

Natural History Museum

呢個博物館真係好大，比起Athens的博物館還要大好多， 門口掛著一副大的恐龍骨，我同同伴相約分開行一小時後集合。

大恐龍

博物館講解了很多生物的進化歷史，亦解釋了很多人體的問題，其中有一part是講人的memory，有電腦模擬罪案，你要仔細記住每一點之後答問題。好好玩呢～

博物館內分開很多不同的sections，有mammals、fish、dinosours…我對mammals最有興趣，看了很多很少見的動物標本，利害！

大bear bear

未見活的, 先見死的...

一個鐘根本唔夠行，但因為我地之後重有兩個博物館要行，所以行多45分鐘就走了。

之後我們去左鄰近的Science Museum，本來以為會有關於天文的展品，但原來只有太空模型，有點失望。

飛機之一

展品包括車、船、飛機、生化等等，最特別的是Medical History那一部份，不過呢個展館比較隱秘，要走樓梯，轉彎等等先會去到。

總結－呢個博物館比較悶。

然後準備去今天的重點－The British Museum！

大英賊竇館

大英博物館簡直是賊竇，其他國家的展品佔九成，英國本土的，可能只佔一成左右。

賊竇好大，展品內容豐富，同時亦分佈得頗有條理，以國家地區分類，由於剛去完希臘，我第一站便前往Greece and Roma section。

希臘展館文物之一

巴特農模型

入到去心情真係有點激動，除左因為展品好精彩外，亦好慨嘆呢個世界的畸形！大英博物館內竟然會有一個pathanon section，相比之下acropolis museum的展品真的少得可憐！你話英國錯嗎？但如果冇大英博物館，好多國家的古董藝術品根本逃唔過戰亂而被損毀，一邊參觀，一邊覺得非常矛盾，要英國交還國寶，可以保證之後保存得比而家好嗎？

地下室有一個雕塑館，收藏由希臘及羅馬搶奪回來的雕像。

之後繼續前往Egypt、Africa、China等等的展館，在埃及的展館，有數具木乃伊，好可怕呢。

你連復活島的石像都搬過來?

非洲土著的展品亦很好看，不過由於時間關係，冇辦法一一細看解釋。

中國的展館，唐三彩、大佛…什麼都有！最恐怖的是一尊兩層樓高的大佛都竟然可以搬到英國！

其中令我最impressive的展品是一個水晶枯髏骨，記得小時候聽過關於水晶頭的事，好像說是那個接駁、打磨等技術之高超，現今科學亦難以做到，而且我記得以前有電視節目指呢個頭有預知未來的能力。展品介紹呢個枯髏頭係賊竇館少有用錢買入的，唔是偷唔係搶，可能係假的呢！

賊竇館有一個值得一讚之處是gift shop及book shop section會連接著不同地區的展館，你每走完一個展館，一出門口便會見到有相關資料的書籍或紀念品售賣，雖然我不支持捐錢俾賊竇，但我還是在這裡買了一本有關希臘神話的字典。

擲鐵餅

離開搭underground回朋友家時看見地鐵站外有很多鮮花，猛然記起今日是地鐵大爆炸一周年。英國人雖然比較假，但這個場面，我覺得很有人情味，很warm。

行了一整天的博物館，很累呢…

6/7/2006 希臘, 後會有期了~

8點幾起身，開始一日的＂血併＂。先往Omonia square的Hondos center買香薰，因為實在太便宜了，2.1Euro一支，我之前已經比較過附近的香薰店，竟然Hondos center最便宜！

由於希臘之旅係我人生中第一次的自遊行，而且重要去到咁遠，所以我預計會買超多野回港，為方便載手信，我在Omonia Square附近買了一個布旅行箱（可以上機的size），估唔到咁平，５歐羅咋！

之後行去plaka，作為精明的消費者，早上以格價為主，plaka真的有很多有特色的東西，絕對令人目不暇給！

由於是次行程獲得多人贊助（往後幾年都已經冇左呢支歌仔唱），所以要買好多手信返香港！

非常喜歡plaka賣的國際象棋，一隻隻小銅人，還有很美的棋盤，雖然唔識捉棋，但我都買左一盤返香港。

出名的Ouzos酒，酒精度44%，當地人是加冰或以水稀釋才喝，加上漂亮的樽型，做手信一流！

大大支鉛筆，買俾小朋友。

希臘民族騙人事件絕對係聞名全球，曾經看過一本書，話希臘人從來唔覺得呃人係罪，反而佢地覺得呃人係有智慧的表現，而在購物的過程中，佢地無時無刻都會表現呢種＂智慧＂，例如找錢時會將土耳其錢＂誤當＂為歐羅找俾你。

中午回酒店check-out，先寄存行李，再往plaka買買買買買…

簡直係搬晒成個雅典走呀！

五點幾往Syngama square搭X95去機場，希臘…後會有期了！

bye~

晚上九點幾去到London Heathrow，開始英國之旅了！

是次倫敦行將會住在同行者朋友的朋友家中，在機場坐underground去Earl's court，倫敦地鐵，又係冇冷氣的…

London地鐵

累了累了…要早點睡。

5/7/2006 Mykonos, 我終於逃離你了！

琴晚去船公司打聽航班消息時，職員話佢地已經收工，要第二朝九點先開門，於是我地一早起床，準備去船公司打聽打聽。

求其行入一間船公司問，職員話電台報導風浪太大，所以今日可能全部船停航。

其實我地望出海都見有好多白頭浪，我地聽日就要搭飛機離開希臘去英國，好驚趕唔切呢。

我地買的係Hellenic seaways的船票，等到十點佢地公司開門，職員又話要等到中午十二點先知道有冇船返雅典，唉…心情跌落谷底…

記住，出外旅遊一定要買保險，去希臘重要預鬆Ｄ船期，否則你會非常徬徨。

打返香港問保險agent，佢話只要有証明係天氣關係停航就有得賠，於是我們改為搵機票，但點知，今天去雅典的航班全都滿座。

就算有機位，一張機票要170Euro。

嘩…

心情好差…

好彩，琴晚偶遇無啦啦一齊瞓左一晚的韓國女孩，佢竟然搵到Blue star ferry今日會有兩班船往雅典，即刻跑去買飛啦！

下晝一點半在Mykonos碼頭出發返回雅典Rafina，其實當時我地根本唔知道邊度係Rafina，我地只知道要盡早離開呢個小島，以免再有任何突發情況出現。

跟住返Hellenic seaways辦退票手續，職員說要去搵port police才可以辦到琴晚停航的証明文件。呀？少少事都要勞煩警察？

Port police同普通的police不同，不過可能佢地的工作速度係一樣的慢…

張証明其實只需要警察填我個名同日期就得，但佢地竟然用左十五分鐘！！！

我實在太愛香港人的速度了！

十二點去到碼頭準備上船，有一堆backpackers坐在地上等緊，但碼頭有職員話Ｄ船又cancel？？？我明明見到有一大隻船泊左岸，佢係裝飾的嗎？？？

 我地去附近的船公司問問，職員話班船絕對冇cancel，我地決定繼續等，總之誓死要衝上船！！！嘩哈哈哈…

不過韓國女仔好擔心，佢放低背囊話要去其他地方睇睇船班問題。

佢離開冇幾耐開始有乘客上船了。

越來越多乘客上船，但佢都重未返。

由於我地買的係economy class，早上船先可以霸個有利的非吸煙位置，但韓國女孩過了半小時重未返來。

我地決定先上船放低行李，一個人看管船上行李，另一個落船等女孩返來。我地請身旁的美國女孩幫手睇住韓國女孩的大背囊，跟住上船。

上到船望返去岸邊，見到一個類似那韓國女孩的人背著背囊離開，我即刻衝落船搵佢，但落船後已經追唔到了。

美國女孩話已經同佢講左我地會再回來，但佢似乎冇乜反應。

唯有先上船，再定時巡視一下吧。

夠鐘開船，重未見韓國女孩，已經行左成隻船幾次，但仍然搵佢唔到。

點解佢會唔上船呢？我地完全諗唔通，希望佢平安無事吧！

到達Rafina碼頭，已經係下午七時多，幸好呢度的日落比較遲，天還是亮，較容易搵車回市區。

幸運地看見一輛旅遊巴往Athens市中心，即時衝上車！

四十分鐘後去到沿途的一個metro station，即刻落車轉metro返monastiraki，哈哈…我終於返來了！！！

返去Arion Athens Hotel check-in，放低行李，行去附近的餐廳食飯！由於退票的關係，多了鬆動的資金可以搵間好Ｄ的餐廳食餐好少少，是晚order了一個pork steak with potato，7.5Euro。

上菜時嚇死我，竟然係成塊鉆板咁上？？？一共有四塊豬扒，無限薯條…實在太可怕了！！！我第一次覺得希臘食飯比香港平！！！呢個豬扒肯定比扒王之扒抵！

最後一晚在希臘了，聽日將會離開前往London，對London不太期待，反而最期待聽日的shopping行動呢！哈哈…

bye Mykonos

4/7/2006 噩耗!!! 被困Mykonos!!!

今早在民宿起床，開門，非常大風，覺得有少少凍。

室外竟然比室內的冷氣房更凍，天下間竟然有咁可笑的事？哈哈…

中午在民宿退房後，搭巴士去paradise beach，今日我地計劃只係攤在沙灘曬太陽，享受一個下午。

去到paradise beach，終於有機會一嘗kalamari了，佢係Mykonos出名的炸魷魚圈，其實，即是椒鹽鮮魷。

Kalamari

再買了一杯mixed juice。

印象中係幾好味的

搵左一把太陽傘下休息，盛惠9Euro。

呢D太陽傘係要錢租架

躺下，海風加上唔知邊度來的風，凍到我想著風褸囉！但邊有人去到海灘著風褸咁型呢？唯有搬開一Ｄ張摺床，直接曬太陽。

水好清，但好凍的…

瞓下，醒下又瞓下，負責收太陽傘租金的印度人Mike走來吹水。佢話佢來自印度，有個哥哥在香港，自己想在希臘賺錢，然後去古巴開酒吧。（內容大約如此吧，不過點解會在希臘賺錢然後山長水遠去古巴開酒吧呢？

聽聞Paradise beach係一個天體及同性戀沙灘，不過其實我睇唔到太多天體人士，亦唔覺眼有男同志（我成日覺得同性戀多數係靚仔），哈哈…

大約四點幾，突然身後傳來超大聲的音樂，如果有睇過Leonardo di Carpio的The Beach的話，你會覺得自己做左主角。

沙灘上其實有幾間酒吧，酒吧桌上開始輪流有Ｄ女人上去跳舞，佢地一路喪fing頭一路除衫，桌下的男人睇到好興奮，不停請佢地飲酒，Ｄ女人飲完酒又high過。


自問唔係party animal，加上怕嘈，所以我離開partner自己搭巴士回Hora行下。
回到Hora，食個Gyros，再四處逛逛。

在希臘差不多日日都食的Gyros

食飽，拎住部傻瓜機四圍影相，突然在街角見到兩隻初生小貓，即刻狂影相啦。

期間，有一個日本女攝影師行過來指手劃腳教我應該以乜野角度影相會最好，只可惜我完全冇呢個觸角，影極都唔好呢。

小可愛~

四圍行下睇下人，夠鐘同partner集合了，於是搭巴士回民宿，準備拎番行李搭夜船走人。

等巴士時，有幾個派傳單的希臘男人知道我由香港來，就不停耍武功。

雖然唔鍾意成龍，但無可否認佢真係令全球好多人知道地圖上有一細點叫做香港呢。

佢地送左張新開酒吧的free entry pass俾我，不過警察一行過佢地就即刻四散，哈…呢間酒吧…
返到民宿partner已經到左，佢同一個法國uncle吹緊水，呢個uncle亦係被民宿女主人騙左上來。呢個女人…

終於等到民宿女主人到來，佢載我地去到碼頭後就開車走。我地去到碼頭，碼頭職員話今日的船因為太大風，全都cancel了！

呀？？？點解頭先個民宿女人冇同我地講既？

點算？

冇辦法，唯有返市中心搵民宿啦。

當時已經係夜晚十點。

在一群狼狽的落難旅客中，我地見到一個韓國女仔，佢去完土耳其旅遊，今日剛到希臘，準備乘夜船離開去雅典玩三天。佢比我地更狼狽，於是我地叫埋佢一齊搵住宿。

即時搵住宿係我去旅行時的弱項，我成日都分唔清邊間係酒店邊間係住宅，好彩partner唔知o係邊度搵到個男人有酒店房出租，一間細房有一張double bed，45Euro，而且o係正市中心！

不過今晚停航令我意外地睇到意大利對德國的下半賽比賽，哈哈…最後意大利贏埋，迪比亞路有入球，超開心呢！