29-12-2017 烏本橋日落

今朝起身梳洗完去食早餐，9點出車去Amarapura的Mahagandayon Monastery，我最初以為係一班僧人化緣，原來佢哋係排隊去食飯。

老實講，日日食餐飯都被班遊客影相其實都幾厭惡，亦由於呢度太出名，所以有晒指示叫大家唔好騷擾到僧人食飯。

不過過千個僧人一齊排隊食飯又係幾壯觀既。

跟住我哋出發去Inwa。

首先要坐船過河，然後就要坐馬車，其實我唔係好想坐馬車，但唔坐馬車其實都冇太多選擇喺短時間內遊Inwa。

其實架車鄧到我腰都斷！

我哋去咗唔係好多個景點，好多寺廟對我來說都係差不多樣，所以我都係唔知自己去咗邊⋯⋯

咁去完Inwa，本來我哋都想返一返酒店再出發去睇日落，但司機堅持唔夠時間，於是佢車咗我哋去一個叫做Ocean既shopping mall行超市。

行咗一陣就出發去U-bein Bridge。

呢條烏本橋附近好似D嘉年華會咁，有好多小檔攤，最詭異係有個人肉摩天輪，老老實實我覺得佢比好多機動遊戲刺激。

 

D男人會爬上去最高然後拉郁個摩天輪

本來諗住要搭船啦，不過後來覺得搭船睇日落都未必靚，於是我哋去咗一個小草地買咗兩個椰青睇日落。

都唔錯啦。

睇完日落，上網睇trip advisor介紹去咗一間叫做m steak house的地方食晚飯。

零裝修，塊扒都好一般下⋯⋯

跟住返酒店。

落車後我哋發現有兩個鬼佬由我哋酒店出去喎，咁八卦既我哋就跟住佢哋行啦，佢地好識途老馬咁去到一間叫做shan ma ma既大排檔食飯，呢度有超多外國人囉！

雖然都飽飽地，但嚟到又冇理由唔食架，所以又食多餐了。

食飽，返酒店。