去到蒲甘機場，佢個lugguage claim係全人手操作，有專人拎件行李同你確認，雖然都係落後，但感覺比尼泊爾內陸機場更可靠。
出關後首先買咗個5 day pass去睇古蹟，20美金一個人，即使我哋只去三日，但都係基本上硬食。
首先去酒店放低行李，今次入住Bagan Star Hotel，去到佢話只有一間房，攪咗勁耐終於安排到兩間房俾我哋，我哋未可以check in，所以放低行李就去咗morning market行。
呢落乾濕貨一齊賣，咁行行下有個女仔無啦啦塞舊野話要送俾我，其實一來擔心騙案，二來我唔知嗰舊係乜，三來乜都冇做過做乜要收人野呢？咁我堅持唔要啦，亞小妹妹被拒絕後好嬲咁走咗。
我哋買咗D生果，跟住就去睇寺廟。
第一間係Shwezigon Pagoda，一間金廟，喺廟中會見到一班小學生朝早要集體驗佛經。
第二間應該係Shwe Leik Too，因為我哋有司機，咁佢帶我哋去D佢覺得好睇既寺廟，但因為語言不通，我盡力記低我去過既地方了。呢個廟主要係爬一爬上去影張相跟住就走。
第三間Htilominlo，呢個個塔頂維修中，個廟外面影相係幾靚既。
之後跟住DK介紹去咗Black Bamboo食lunch，物非所值。
食飽返酒店休息一陣。
一入到房嚇一嚇，呢度每間房都會有一幅畫，我間房幅畫好似係蒲甘最後一任皇帝全家合照，我真係堅驚，你行每一個角度都有七個人望住你。
就係呢幅相（網上圖片）
因為幅畫太令人不安，所以我瞓得唔好，跟住我哋出發去Shwegugyi睇日落，不過同柬埔寨一樣非常一般。
睇完日落，我哋去咗一間叫做Weather Spoon既餐廳食飯，價廉物美呀！
返到酒店，我做咗一件非常港女既事，就係叫酒店職員幫幫手拆咗幅畫或者搵野遮住佢，我一望住幅畫個人就打冷震。
最後職員搵野包住幅畫，我終於可以瞓了，不過我下次（有機會的話）絕對唔會再住呢間酒店！
