27-12-2016 跟local tour玩雪兜

今朝一早起身去明洞集合，今日join local tour去郊外玩。

第一站去摘士多啤梨，點知去到話因為天氣問題收成唔夠，所以每人只可以摘兩粒，哈哈！

我真係覺得個團係一個伏。

咁摘完士多啤梨就會教大家整果醬，其實本人都係有整開果JAM，佢教個方法實在太求其，簡直係亂X咁嚟，完全浪費食材。

好頹咁摘完兩粒士多啤梨（不過都甜既），就出發去玩雪兜。

其實我嚟首爾係為咗睇雪啫，睇唔到就玩下地上的積雪都算了。呢個雪兜都幾好玩，希望下次可以試下滑雪啦。

玩完去食飯，lunch食雞煲，餐飯一般，我地成團人包咗一間類似民居的小餐廳食飯，有樣野我一定要講，香港人去廁所的污糟程度係世界級！成個餐廳得我地一團人，全部香港人講廣東話，我食飯前同食飯後用個廁所個分別真係好大，頂你痾尿個沿住你大腿落嚟架？點解可以痾到成個廁所板都濕架？整濕咗唔識抹架？唔該唔好再笑大陸人，香港人去廁所根本冇分別！！！

食飽，搭車去聖誕老人村。

呢度係D小木屋，可以餵下羊，冇乜特別，只係特別凍，凍到電話都開唔到，哈哈⋯⋯

由於電話都開唔到所以影唔到相。

跟住搭車返首爾，我諗我唔會再有下次跟呢D團去玩了。

返酒店放低野，然後出去東大門附近個廣藏市場食野，原來之前running man有嚟過，唔怪之得咁熟口面啦。

求其入咗間舖食野，又煎又炸我地應該嫌命長。

食完野去東大門行街，不過我都係冇乜心機買衫，所以行咗陣都返酒店了。

返到酒店，見到而家得－6度，買支雪糕食下先，哈哈！

26-12-2016 去水族館

今朝訓到自然醒，真係爽！

梳洗完去附近間Lotteria食早餐，兩個人share一個餐，頹到震。

食飽，搭地鐵去三成站的coex mall，為咗去睇佢個水族館。

水族館入 場費25000won，不過都值得去既，佢D水箱都幾乾淨，魚的種類多，相對Genoa嗰個號稱全歐洲第二大的水族館，coex呢個抵玩好多！

玩咗成兩個鐘，都幾抵吖。

玩完就喺商場入面一間土耳其餐廳食飯，12900won一個set，唔錯喎。

食飽返酒度休息一同放低D野，跟住出發去北村韓屋區。

其實我都幾佩服D人竟然可以着韓服行，正如去日本一樣，着住和服行街其實真係好辛苦（所以我完全冇做過呢D事）。我地行咗去observatory terrace睇景，跟住慢慢行落山。

我都唔知自己行咗去邊，不過行行下竟然去咗仁寺洞。

天黑喇，冇乜野行，我地食咗串魚蛋就去首爾站超市行，買咗D野返酒店，之後出去附近食炸雞。

老老實實韓國炸雞堅好味，D雞好滑，不過勁熱氣。

食飽行下夾下公仔（又話唔好玩但又要玩），玩完返酒店。

25-12-2016 聖誕去首爾

年紀越大越冇記性，去到機場竟然唔記得拎wifi蛋就上機！嗚⋯⋯唯有去到首爾租啦！

去到首爾，第一次搭機場巴士去市區，搭6011號巴士去誠信女子大學，今次入住Best Western。

住大學區都唔錯，好多野買同食，而且價錢唔貴，我地放低行李整理儀容後就去附近買紫菜包飯同肉包食，食咗少少野就出去明洞行街。

明洞的聖誕裝飾靚過香港好多，不過其實我真係唔太鍾意明洞，廣東話多到我唔覺得去緊旅行。

求其四圍行咗一陣就去咗明洞Cathedral，剛巧有台彌撒，喺香港冇望到子夜彌撒就去睇下韓文版啦。

當然完全唔知佢做乜啦。

明洞教堂外有好多LED花，現場睇幾靚，影相比較差（特別用手機影）。

參觀完教堂，見到有條樓梯落教堂下面咁就落去睇下，下面又係cafe，韓國人真係好鍾意飲咖啡，另外有間小店賣天主教的紀念品。

去完教堂，求其去咗一間餐廳食燒肉，明洞的燒肉真係差過釜山好多囉！

食完燒肉諗住行下超市啦，點知Lotte關門，咁Young Plaza個職員話首爾站12點先關門，我地拿拿聲搭地鐵去啦，點知去到上網見到話今日休息，哈哈，於是又搭車返酒店附近行。

呢度都有夾公仔店，不過我覺得都幾呃錢，D夾會落到好低，D公仔又唔靚，1000won夾咗一次就冇再玩了。

喺呢度行咗半個圈，搵到有間細超市，買薯片返酒店食。

京都感想

1. 京都真係有好多寺廟，出發前我睇咗本介紹京都寺廟的書，感覺上好過上次嚟京都一舊雲唔知做緊乜咁。

2. 嵐山好靚！

3. 其實我鍾意京都多過大阪，起碼住的房大D，感覺又好似多野玩D。

4. 貓頭鷹店真係千祈千祈唔好去！太虐畜了！

5. 富士山杯係成個行程的best buy！

6. 我真係超愛玩夾公仔！

7. 清水寺夜祭值得去呀！好似靚過朝早。

16-11-2017 最後一日在京都

今日最後一日喺京都，起身第一件事就係執行李，估唔到竟然塞得落喎，只係隻大公仔要hand carry啫，唔錯唔錯！

check out後去松屋食早餐，不過個早餐食海膽飯其實真係好不可思議！

食飽飽，行咗去東本願寺參觀，其實日本的寺廟好多都好似樣，基本上我都唔係我識得分別每一個的不同之處。

咁好快就行完東本願寺，之後去咗出面個公園仔影相，紅葉同黃葉都幾靚。

影完相就行返去京都駅的拉麵小路食晏，我地求其揀咗一間唔駛點排隊的食，好飽。

食飽去咗伊勢丹睇下京都個全景啦。

 
之後返酒店拎行李，然後搭2點鐘JR去大阪機場，點知去到機場先發現某人記錯咗時間，我地竟然早咗成兩個鐘去機場！！！於是我地寄咗行李就去咗機場附近個outlet行街。

好好彩趕得懾搭3:40分班shuttle去outlet，其實D野都幾平既，不過我真係懶得拎，最後敵唔到2000円的staub盤，抬咗個返香港。

估唔到outlet竟然有Godiva，買咗少少，然後返機場，買埋Royce就返香港了。