18-12-2015 開始南美之旅

終於實現到我的南美之旅了!!!!!

夜晚11點幾機, 搭德航經法蘭克福轉機, 香港飛南美多數選擇美國, 中東或歐洲轉機, 美國唔想拎簽證, 中東中間transit時間短, 連坐廿幾個鐘好似好辛苦, 最後選擇德國係剛巧可以去埋佢的聖誕市集。

第一日, 飛機度過。(德航往來香港法蘭克福航班係A380, 好好坐)

台北感想

1. 第N次去台北, 其實都冇乜大驚喜, 連夜市的野都食少咗了...

2. 大安森林區真係幾好住, 去邊都好方便, 而且又冇咁多人, 朝早又可以去跑步, 可惜我研究唔到點樣租佢D單車踩。

3. 猴硐始終係最好玩, 今次行埋去橋另一邊都好靚, 可惜冇時間去瀑布同神社。

4. 南昌路夜市真係廢廢地, 士林規模始終係最大, 不過夜市食物都係炸為主, 年紀大食少咗了。

5. 去陽明山其實真係要包車, 等公車真係有排, 今次咁啱又大霧, 有點失望。

6. 華山又係一個失望的景點, 不過論失望程度不及國際藝術村。

7. 寶藏巖有驚喜。

8. 天母市集冇乜特別, 唔近捷運, 對我來說有點唔方便。

9. 整和菓子本來以為會學埋點整個餡同皮, 可惜只係學整造型, 有點失望。

10. 食麻辣火窩真係平靚正, 下次一定要再食!

11. 台北物價真係越來越貴了...

 鬆弛熊 :「你地做乜走呀?」

19-10-2015 瘋狂夾公仔

最後一日在台北。

起身後食完早餐後執野, 跟住去101睇幾米巴士, 不過其實真係完全唔特別, 唔去唔會可惜。

 幾米巴士

101真係有超~多~大陸旅行團, 我地都冇入商場行, 又冇上觀景台, 影完架巴士就去西門町了。

西門町其實都好似旺角, 啲舖頭基本上開好晏, 去西門町其實為咗海賊王專賣店, 不過見佢未開 就去誠品行一陣, 見佢地庫有機打, 就落去打下機先。

喺香港好多機舖都執晒, 冇打機好多年, 今日時間早又冇乜人, 簡直好似包場咁打機。

10蚊新台幣夾一次公仔, 明明我去日本時都冇咁瘋狂咁夾公仔, 但偏偏喺呢度就係咁夾, 不過呢度的機有古惑, 我有好多次係夾咗上嚟, 但佢吊到上去就會無啦啦搖兩搖, 搖到隻公仔都跌返落去。

我要去日本夾公仔!

行一陣書店, 然後去海賊王專賣店, 呢間野物價好神奇, 應貴唔貴, 唔應貴的又好貴, 哈哈...

買完野去食焗飯, 其實我係想食魯肉飯, 但喺西門町搵魯肉飯其實係咪不可能的任務呢?

食飽, 行去遠東百貨買少少手信, 之後見仍有時間, 又走去夾公仔, 哈哈... 我已經瘋了。

跟住搭捷運去東門站間金石堂拎書, 拎完行返酒店放低, 然後出去附近行下, 行下行下又走左去師大附中, 哈哈... 點解一間中學可以大到咁? 竟然有晒網球場排球場籃球場???

 在金石堂見到的貓

行完返酒店拎行李, 然後搭的士去機場, 半個鐘就到了。

check in後入閘四圍行, 機場有機打架, 哈哈... 好開心, x box 原來都幾好玩喎。

咁就玩完5日了。

18-10-2015 和菓子堂

話說我專登嚟一轉台灣就係為咗今朝要去上和菓子堂。

近排突然愛上和菓子, 但因為街買的和菓子都好甜, 基本上冇可能放入口, 所以我想自己整到又靚又食得的和菓子。

因為唔識日文的關係, 而香港有教和菓子的堂我都報咗, 暫時唯一的出路就係去台灣學。

一早起身落樓下食早餐, 跟住搭捷運去市長官邸藝文沙龍上堂。

課室

老師的作品真係好利害, 原來工藝菓子可以整到咁大型, 今次絕對擴闊咗我對和菓子的印象, 而老師準備的材料真係好好味, 呢D就係我想要的和菓子, 唔會甜到漏, 但係入口即溶。

但可惜今次冇教點準備材料, 只係教點造型, 不過單係造型都好複雜。

 

 工具

 材料已經準備好

我的製成品

雖然學唔到點煮有點失望, 不過呢堂都幾好玩~ 有機會我都想再過嚟學多D。

整完就去永康街食晏, 突然好想食日本野, 所以去咗呢間食。

 鰻魚飯真係好好味

呢間的鰻魚話係新鮮剖的, 佢煎得好好味, 唔似香港食淋晒, 好香口好好味, 反而個刺食就冇乜特別。

食飽飽, 行去金石堂諗住拎書, 點知佢話未送到去店, 好擔心, 聽日就走了, 如果趕唔切就麻煩了, 好彩店員話如果真係趕唔切咁可以取消, 只係一心諗住買咗但最後原來係冇都會有點失望。

返酒店放低今朝整的和菓子, 然後上網無意中見到有個叫做寶藏巖藝術村的東西好似幾靚, 於是就搭車去公館站睇下。

有次去台北我有參觀台大, 所以都去過公館站行, 但完全唔知有寶藏巖呢樣野, 我地出捷運後按住指示牌方向行, 但個指示牌好奇怪, 行行下又指返轉頭, 於是我地用晒GPS又問路人先去到。

迷路時行過的疑似荒廢小村

寶藏巖係一個觀音寺, 寺後面的小山丘有一堆石屋, 而呢堆石屋入面住咗一班藝術家, 所以會有啲藝術品喺呢度展覽。

寶藏巖

其實寶藏巖的位置都幾靚, 背山面海, 就算唔睇藝術品都值得嚟行吓。

喺度影吓相行吓, 跟住搭捷運去忠孝復興食火窩。

市長官邸的職員介紹咗幾間火窩店俾我地, 我地最後揀咗去食馬辣, 我地5:50去到, 要到6:10先知有冇位, 好彩有位咋, 下次去食要一早訂枱了。

其實應該係我地大鄉里, 又唔上網睇資料, 又唔睇旅遊書所以唔知呢間火窩店啫, 現場所見其實有好多香港人, 我以為返咗香港。

第一次食麻辣火窩, 都幾好味喎。

而且佢有好多雪糕選擇, 又有自助甜品同生果揀, 好正。

食到好飽, 本來諗住試下去錢櫃唱k, 但兩個鐘要四百幾港紙, 太貴了, 所以去附近sogo行一陣, 跟住搭車去到大安站行返酒店。

原來大安站一出就係師大附中, 哈哈... 無啦啦去朝聖。

超飽, 行返酒店抖下。