1-1-2015 曼谷經典行程

由於昨日倒數的關係, 今早酒店非常貼心, 早餐延長至下午三點。

不過我地都係十點幾落去食早餐, 早餐都幾豐富, 食飽連晏都唔駛食呀!

食飽, 落樓下經酒店book local tour明天去大城府, 2000b全包, 酒店book應該比旅行社book貴, 不過勝在方便囉。

之後搭BTS去碼頭, 過去去過好幾次曼谷, 今次第一次坐呢D船去景點。

出發前搵資料話可以坐旅遊專船去唔同的景點, 但去到碼頭可能行錯位置, 結果搭咗express boat, 100b一位, 超快咁去到大皇宮。

express boat, 快到帽都甩

其實去咁多次寺廟都知應該要穿長褲有袖衫, 但我次次都諗住去到會有得借, 點知今次撞板, 大皇宮入口分開咗local同foreigner兩條隊, 基本上foreigner有9成都被佢捉住要去旁邊的小店買長裙, 而且條裙盛惠300b。

中晒伏。

乖乖俾錢買裙入宮, 哈...

今日唔知係咪乜野泰國特別假期, 入大皇宮唔駛入場費, 呵呵...

大皇宮

由於近一兩年突然迷上玉石水晶, 所以今次入到大皇宮, 首先去睇玉佛寺, 哈哈...

今日超級多人, 逼咗好耐先入到玉佛寺, 而玉佛寺係唔准影相, 所以排咗好耐隊, 入去行咗一個圈就走了。

好多人排隊呢...

行完玉佛寺, 四圍參觀下整個大皇宮, 非常有趣係入面有個吳哥窟模型。

吳哥窟

其實我一直以為大皇宮係泰王住的地方, 所以過去一路都冇參觀過, 不過知道玉佛寺在大皇宮內所以先順便參觀埋, 大皇宮入面有好多建築, 但我對建築的知識近乎零, 所以覺得係一群佛寺...

去完大皇宮, 準備行去city pillar, 在皇家田對面見到有座建築物免費入場, 八卦下入去睇下, 我查地圖都見唔到呢度叫乜名, 後來回家上網搵, 原來呢幢建築物叫做Thaworn Watthu, 係一個博物館, 入面的所有展品都係冇英文, 所以我唔太知呢座野展示乜野, 網上資料話呢幢建築物係用來印製報紙相片等等, 呢度完全冇外國遊客, 所以有興趣可以嚟睇下。

Thaworn Watthu Building

去完呢個Thaworn Watthu Building之後, 經過皇家田行去city pillar, 期間在皇家田的樹上見到松鼠, 哈... 可愛~~~

好可愛~~~

City Pillar又係~勁~多~人!!! 究竟今日乜野日子?

city pillar

睇完city pillar, 四圍亂行又去咗一個unknown的露天寺廟, 今次係一隻豬的像。

露天寺廟

好有趣。

之後行去臥佛。

幾年前去臥佛係冇乜遊客, 今次去好多人, 逼到癲咗, 而且今次要俾入場費, 嗚...

臥佛

臥佛寺

喺臥佛寺兜咗個圈就行去碼頭搭船去高山路, 今次終於搭啱遊客的船, 20b就去到了。

係呢D船喇

落船後四圍行下先, 原來高山路有個炮台架喎。

炮台

四圍行下睇下, 跟住入到酒吧街求其搵間餐廳食飯, 又飲我最愛的冬蔭功湯了~~~

燒燒燒

 食飽, 喺高山路夜市閒逛, 食下雪糕睇下野, 然後搭的士返酒店。