Vicky's Travel Blog: 2月 2015

3-1-2015 法醫博物館幾時開門架?

今早起身食完早餐搭BTS去Central World, 不過唔係行商場, 而係行去商場後的一條小運河, 搭船去金山寺。

呢個過程都幾得意, 出發前上網查資料睇曼谷的運河船路線, 曼谷主要兩條河, 一條係沿經大皇宮臥佛寺的主要大河道(經呢條河可以去埋大城府架), 另一條就係會經過Big C, Siam Discover等等景點的Khlong Saen Saep運河。

我地由Pratu Nam站坐船去到Golden Mount終點站, 上到船就會有人過來收錢, 船開你就拉高側邊個帆以防彈水就可以了。

Khlong Saen Saep運河

船內

去到總站, 經過條白色橋直行5-10分鐘就會去到金山寺(題外話, 其實幾個運河站都有呢條白橋)。

跟人行

去到金山寺, 要行一段小路上山, 上到山可以俯瞰整個曼谷的景色, 所以有人話喺呢度睇日落都唔錯。

金山寺山下

上山途中

上到喇

曼谷景色

到頂了!!!

金山寺真係幾值得去, 而搭呢個運河的經歷都幾好玩。

之後我地落山, 行返去運河站, 搭船去Siam Discovery, 食個Swensens當午餐。

食飽, 搭BTS去Saphan Takain站轉船, 準備去法醫博物館。

出發前我都上網睇咗個開放時間, 佢冇話今日冇開架喎, 法醫博物館位於一間醫院內, 據聞裡面有好多屍體標本。

博物館

跟住唔太清晰的指示牌走, 終於去到博物館, 點知管理員話今日同聽日都唔開, 唉... 我聽日都走喇... 你網上又冇話今日唔開, 唉... 無緣...

醫院其實冇乜野睇, 既然冇得睇博物館, 我地選擇搭船去唐人街食燕窩。

唐人街其實真係幾亂, 既然嚟到, 就去埋金佛寺啦。

唐人街

金佛寺

我地係守法的小孩, 有俾錢買門票, 但其實都冇人check既...

睇完就去食燕窩, 我太愛曼谷的燕窩, 足料又抵食。

好味道~

食飽, 買埋林真香就返一返酒店休息。

小睡一會, 夜晚搭船去asiatique。

asiatique

在asiatique晚飯, 老實說, 我覺得呢度D野好貴, 而且冇乜特別, 所以食完晚飯行一陣都回酒店了。

2-1-2015 遊大城府

今日join local tour去大城府。

一早6:15就食早餐, 然後喺lobby等人接去跟團。

由曼谷去大城府的summer palace大約一個鐘, 夏宮主要分為四個唔同的styles--中國, 歐洲victoria, 泰國同柬埔寨, 入去夏宮又係要着長裙, 好彩今次醒目有帶!

泰式

中式

柬埔寨

歐洲

希望我冇記錯啦, 哈哈...

留在夏宮的時間其實唔多, 好多地方都唔可以仔細睇就要走了, 好勉強入咗去中式同歐洲式的宮殿行一陣, 再上埋個燈塔影幾張相就要走了。

中式宮殿入的牌

上燈塔睇全景

歐式style的小石像

去完夏宮就要上車去大城府了。

導遊的講解好精彩好仔細, 佢話全泰國的建築主要分做六個styles, 泰國, sri lanka, cambodia, 越南, 中國同緬甸, 不過大城府內只有頭三款。

佢教我地認住, 尖頂係泰式, bell shape係sri lanka, 粟米形係柬埔寨式。

自左至右 : 柬埔寨, 泰, sri lanka

應該冇分錯吧(希望)。

大城府其中一個最出名的景點應該係呢尊佛吧。

樹中佛頭

大城府

然後喺一個廟入面睇咗一尊金佛。

金佛

導遊講書時間 : 佛像主要有三個姿勢, 坐姿左手屈曲右手垂低(如上圖)代表伏魔, 站姿舉右手表示停戰, 側臥(臥佛寺咁的姿勢)係佛祖圓寂時的姿勢, 而平臥就係睡姿。

不過導遊話其實佛像有好多個唔同姿勢代表唔同的事, 佢只係好簡略咁講大概意思俾我地聽, 又學到野了!

然後又睇下傳統泰式屋。

傳統泰屋

導遊話2011年大水災, 大城府基本上浸晒, 但呢間泰屋係完好無缺。

中國豆腐渣要學下囉!!!

睇完都要搭車走了, 其實成個團真係好趕, 我知大城府仲有好幾個景點我係未睇, 不過都冇時間了。

搭車去碼頭, 然後搭遊船回曼谷, 船程2.5小時, 可以喺船上食自助午餐。

同桌係兩個新加坡人, 佢地好有興趣香港雨傘革命的事, 我好高興可以將支持運動的理據帶俾外地人聽, 示威唔一定代表衝動架!!!

落船轉小巴回酒店休息一陣, 然後搭BTS去discovery買下野, 之後喺siam square食泰國菜, 食飽, 行去Big C買手信。

買完, 回酒店, 今早吹風後開始作病, 要休息了。

1-1-2015 曼谷經典行程

由於昨日倒數的關係, 今早酒店非常貼心, 早餐延長至下午三點。

不過我地都係十點幾落去食早餐, 早餐都幾豐富, 食飽連晏都唔駛食呀!

食飽, 落樓下經酒店book local tour明天去大城府, 2000b全包, 酒店book應該比旅行社book貴, 不過勝在方便囉。

之後搭BTS去碼頭, 過去去過好幾次曼谷, 今次第一次坐呢D船去景點。

出發前搵資料話可以坐旅遊專船去唔同的景點, 但去到碼頭可能行錯位置, 結果搭咗express boat, 100b一位, 超快咁去到大皇宮。

express boat, 快到帽都甩

其實去咁多次寺廟都知應該要穿長褲有袖衫, 但我次次都諗住去到會有得借, 點知今次撞板, 大皇宮入口分開咗local同foreigner兩條隊, 基本上foreigner有9成都被佢捉住要去旁邊的小店買長裙, 而且條裙盛惠300b。

中晒伏。

乖乖俾錢買裙入宮, 哈...

今日唔知係咪乜野泰國特別假期, 入大皇宮唔駛入場費, 呵呵...

大皇宮

由於近一兩年突然迷上玉石水晶, 所以今次入到大皇宮, 首先去睇玉佛寺, 哈哈...

今日超級多人, 逼咗好耐先入到玉佛寺, 而玉佛寺係唔准影相, 所以排咗好耐隊, 入去行咗一個圈就走了。

好多人排隊呢...

行完玉佛寺, 四圍參觀下整個大皇宮, 非常有趣係入面有個吳哥窟模型。

吳哥窟

其實我一直以為大皇宮係泰王住的地方, 所以過去一路都冇參觀過, 不過知道玉佛寺在大皇宮內所以先順便參觀埋, 大皇宮入面有好多建築, 但我對建築的知識近乎零, 所以覺得係一群佛寺...

去完大皇宮, 準備行去city pillar, 在皇家田對面見到有座建築物免費入場, 八卦下入去睇下, 我查地圖都見唔到呢度叫乜名, 後來回家上網搵, 原來呢幢建築物叫做Thaworn Watthu, 係一個博物館, 入面的所有展品都係冇英文, 所以我唔太知呢座野展示乜野, 網上資料話呢幢建築物係用來印製報紙相片等等, 呢度完全冇外國遊客, 所以有興趣可以嚟睇下。