朝早起身梳洗後去附近食熱辣辣的湯年糕, 食飽搭的士去城外巴士站。
其實去到巴士站時我哋都未決定到去邊, 睇書講有旅遊專線觀光巴士, 但我見佢班次好疏, 所以建議搭780號巴士去到島的另一邊西歸浦市先算。
搭咗個幾鐘頭巴士, 沿途見到Jeju International University有櫻花睇, 所以決定回程搭返呢間巴士去呢度影櫻花。
我哋唔知西歸浦有乜玩, 而且我哋又遲咗落車, 所以不在市中心, 於是決定截架的士去咗正房瀑布先。
正房瀑布
正房瀑布話係一個直接流落大海的瀑布, 而且我哋可以行到去好近瀑布下, 所以都幾靚。
正房瀑布
在瀑布附近的石灘見到有兩個亞婆賣刺身, 呵呵... 死就死啦, 叫咗一碟來食。
新鮮, 不過D螺真係好硬。
食刺身
由於我哋喺機場唔係兌咗好多錢, 而我哋又以為濟州四圍都有找換店, 原來錯晒, 我哋其實剩返唔多韓圜, 所以諗住搵地方兌咗錢先。
睇地圖, 估計應該樂天有錢兌喇呱? 咁問完旅客服務中心由正房瀑布點去樂天啦, 點知行極都未去到巴士站, 見到有的士就跳咗上車, 呢程車竟然搭咗成一舊水港紙!
樂天免稅店
去到樂天, 好輾轉地發現只有賭場可以兌錢, 真係去到韓國都要入賭場運下吉。
樂天位於中文旅遊區, 整區我高度懷疑係為中國客而設, 區內有好多不同的收費博物館, 我哋選擇咗去Alive Museum。
teddy bear museum門外
Alive Museum內
好好玩哦~~~ 又玩咗成個鐘。
玩到3:30, 睇地圖見jusangjeolli cliff好近中文旅遊區, 雖然驚去到冇車走, 不過又冇理由嚟到濟州唔睇架嘛。
唔理喇, 上的士先。
一落車就知大鑊, 有對香港男女衝埋我哋架的士度話我哋救咗佢哋, 呢度真係除咗包車同旅遊巴外係冇公共交通工具架!!!
不過我諗, 呢度應該有旅客服務中心, 大不了叫佢哋幫手call的士啫。
呢個jusangjeolli cliff話有25萬年歷史的玄武岩石, 所有人都係喺崖邊遠望, 所以我哋好快睇完就走喇。
jusangjeolli cliff
jusangjeolli cliff
好好彩, 出去等咗一陣就有的士, 即刻上車返去alive museum附近先。
然後搭返780號巴士去jeju international university。
大學入面有條櫻花路, 真美。
jeju international university
jeju international university
jeju international university
行咗一陣本來的一團遊客走咗, 非常寧靜, 極美。
影咗好多相, 好開心。
然後又搭返780號回程。
返到酒店放低D嘢就出去食炸雞, yeah, 今日簡直係搵命搏, 食完刺食食炸雞。
食飽四圍行一陣又返去ZZZ了...
