12-4-2018 旅行青蛙

今朝比較早出門口，因為要喺10點前去到柳橋中央市場。

我哋昨晚路經呢度，再上網睇知道呢度係賣海鮮為主，我估可能有D似築地市場。

我哋搵咗一間好細嘅小店食魚生飯，雖然唔係拖羅，但都唔錯。

食飽，搭車去犬山。

我哋由犬山站行去犬山城，沿途舖頭好多都11點先開，咁我哋沿途都有入D博物館參觀。

早幾日原來係犬山祭，咁我哋參觀嘅博物館其中都有祭寺的花車介紹。

上落城堡的樓梯其實都有D高同窄，上到去城最高層，望到成個犬山市。

睇完犬山城，我哋行返去車站，然後再搭車去名古屋城。

去到名古屋城，最吸引我並唔係城堡，而係出面的紫藤花。

天啊真係好香好靚！我第一次見紫藤花咋！

我呢D冇乜見識既人，覺得名古屋城其實同犬山城係冇乜分別，名古屋城我感覺似大阪城，因為都有𨋢搭，哈哈⋯⋯其實去名古屋城，主要因為玩緊旅行青蛙啫。

影完相，我哋就去咗參觀布池教堂。

去完教堂就搭車去大須觀音。

觀音廟不大，周邊有個好似心齋橋嘅商店街，我哋又夾下公仔啦，不過今次失敗，哈。

之後返酒店放低野同換衫，然後喺附近間拉麵店食拉麵，跟住去咗Big camera買SD card（好貴），然後去咗榮睇TV tower的夜景。

我哋20：58去到Oasis 21，佢21：00關門，剛好趕得切！

睇完夜景返酒店了，今日行咗太多路，好攰。

11-4-2018 換Business機票去日本

第一次坐Business去日本，重要係我討厭嘅CX，哈哈⋯⋯

今朝坐10：10機去名古屋，我哋好早出發，坐機場快線，check in後入去佢個lounge坐吓，不過23號閘口嘅lounge真係好一般。

上到機，個位其實一般，都係伸唔直對腳，嘢食一般，但個service係我坐咁多次CX最好。

喺機上睇咗套唔知佢講乜嘅西班牙文電影。

終於去到名古屋，我哋坐名鐵去到名古屋駅，今次入住Mitsui Garden Hotel，去到酒店都4：30了。

整理好儀容就四圍行，首站，去買鬆馳熊，哈哈⋯⋯

去咗高島屋8樓嗰間，但呢間唔係專門台，之後去咗隔離The Gate Mall 7樓買，終於買咗特別版藍色鬆弛熊了。

呢度賣2500円，香港賣295港元。

退稅途中見到貓巴士

買完野退埋稅返酒店放低野然後出去食飯，今晚喺酒店附近一間叫做昭和食堂嘅居酒屋食飯，一般中伏，平時喺日本其他地方好少會中伏，估唔到名古屋⋯⋯

食飽，剛巧落雨，我哋喺酒店對面間7-11買雪糕食，買咗個新口味食，中大伏！

難食到一個點！

夜少少我哋出咗去地下街行吓，熟習一吓附近嘅路，然後就返酒店休息。

緬甸感想

1. 去咗三個城市，最啱我係Bagan，除咗酒店幅畫太恐怖之外。

2. Bagan嘅日出暫時係我見過最靚嘅日出。

3. U-Bein日落其實都靚，不過四周太多垃圾，扣晒分。

4. 喺緬甸成日要除鞋行路，條路其實都污糟，而且好多沙石，幾痛吓。

5. 大金石上山段路真係好刺激，後生時唔去，老咗真係唔會去。

6. Mandalay Hill上個pointing Buddha可觀性好高，而木廟係我覺得成個trip最靚嘅一個寺廟。

7. 總括來說，Bagan比Mandalay值得去，反而仰光除咗大金寺外其實都冇乜特別。

31-12-2017 回港了

今朝起身落酒店樓下食早餐，我哋11點先check out。

Check out後第一站去昂山市場、Trinity Church同Junction City。

昂山市場應該算係一個玉石市場，不過唔識睇緬甸玉就梗係乜都唔會買啦。

行咗一陣就去附近既Trinity Church，呢個屬於聖公會既教堂。

喺教堂坐咗一陣，我哋行咗去Junction City，都係覺得冇乜特別，睇地圖見到附近有個Hindu Temple，行咗過去望吓，不過我哋搵唔到入口喺邊，所以只係喺門口望一望就走了。

之後我哋去咗Rangoon Tea House食晏。

跟住去咗Karaweik Palace影相。

其實我哋第一晚酒店就係對住呢隻船，不過佢已經變咗好似係餐廳，唔入得去。

咁我哋影完相去咗Myanmar Plaza行街，之後夜晚食韓國菜，由於今晚倒數，我哋怕塞車，所以早咗出發機場。

我哋去到機場都未到10點，不過海關個印已經係2018年。

喺飛機跨年，又踏入新一年了。

30-12-2017 我最鍾意就係呢個佛喇

今日最後一日喺曼德勒，朝早食完早餐執好行李就check out，然後出發去Mandalay Hill。

我哋昨日喺Inwa買咗個套票，咁可以去埋曼德勒山，司機車我哋去到山頂，然後搭扶手電梯上到Satungpyei Temple。

我睇DK介紹話呢度有個Pointing Buddha，係全緬甸唯一一個pointing position，我哋四圍問人，原來佢喺山腰，咁我哋就由山頂行返落山腰。

但我個人最鍾意喺Pointing Buddha旁邊既佛像。

睇完佛像我哋行返上山頂再搭電梯落山搵司機，然後佢就車我哋去Kuthodow Pagoda，呢個話係最大既Library，因為D白塔內的石碑係亦咗Tipitaka（其實我都唔知係乜），咁我地睇完就上返車喇。

之後我哋去咗Shwenandaw Monastery，呢個應該算係我喺緬甸見到最靚既一個寺廟，全木雕，手工好仔細。

去完呢個木廟，順便去埋隔離個Atumashi Monastery，大而無當。

中午去咗LP website介紹的Nova Coffee食飯，質素不錯呀！

食飽要去機場了。

班機delay咗半小時，同埋，係free seat。

去到仰光，又係同一個司機接我哋，今晚我哋住喺Merchant Art Hotel，喺酒店天台見到大金塔，而呢間酒店位於住宅區內。

晚飯我哋就喺酒店旁既餐廳食，非常油膩。

食飽，返酒店。